Шымкент қаласының криминалдық полициясы 50-ден астам азаматты алдаған екі интернет-алаяқты ұстады, – деп хабарлайды Polisia.kz.
Әл-Фараби АПБ-на жергілікті тұрғын арызданды. Ол өз шағымында жарнамалық сайттардың бірінде белгісіз ер адам өзін әскери қызметкер ретінде таныстырып, электронды мотокөлік ұсынғанын хабарлады. Жәбірленуші оған сенім артып, есепшотына 625 мың теңге аударым жасаған. Алайда ол келісілген тауарды алмаған соң, алаяқтың құрбаны болғанын түсінген.
Тәртіп сақшылары аталған жайтты ҚР ҚК-нің 190-бабы (Алаяқтық) бойынша сотқа дейінгі тергеп-тексеру тізіліміне тіркелді. Күдіктілерді іздеуге кірісті.
Шымкент қаласы ПД криминалдық полиция басқармасының қызметкерлері жүргізген жедел- іздестіру жұмыстары оң нәтижесін берді. Интернет-алаяқтықпен айналысқан Атырау және Астана қаласының екі тұрғыны анықталып, тұрғылықты мекен-жайында ұсталды.
Сотқа дейінгі тергеу барысында күдіктілердің жарнамалық сайттарда жиһаз және көлік түрлерін ұсынғаны анықталды. Олар тұтынушылардан алдын ала төлем ретінде, жалпы тауар құнының 50 пайызын алып, содан кейін ізін суытып отырған. Осылайша еліміздің әртүрлі қалаларынан 50-ден астам адамды алдап үлгерген.
Қазіргі таңдакүдіктілер қамауда отыр. Полицейлер оларға қатысты арыз-шағымның көбеюі мүмкін екендігін жоққа шығармайды.
