Алматыда полицейлер тұрғынның ұрланған көлігін тез арада тауып берді, – деп хабарлайды Polisia.kz.
Кешкі алты шамасында “102” пультіне алматылық тұрғын хабарласып Toyota Land Cruiser көлігінің жоғалып кеткені туралы хабарлаған. Көмек сұрағандарға бірінші болып Әуезов ауданының учаскелік инспекторлары жауап берді.
– Полиция аға лейтенанты Бекзат Садықов және оның әріптестері дабыл қаққан хабарламаға бірден ден қойып, жедел іс-шаралар жүргізіп, нәтижесінде көлік бір сағаттың ішінде табылып, маған тапсырылды. Мен оларға жауаптылығы мен кәсіби шеберлігі үшін алғысымды білдіремін, – деді, Алматы тұрғыны.
Ер адам өз тәжірибесіне сүйене отырып, ешқашан көлікті бос жерде немесе түсініксіз жерде қалдырмауға кеңес берді. Оның ойынша, күзетілетін автотұрақты пайдаланған дұрыс.
