Жыл басынан бері Петропавл қаласында қоғамдық орындарды ластағаны үшін 1116 тұрғын әкімшілік жауапкершілікке тартылды, – деп хабарлайды Polisia.kz.
Бұл жағдайлар негізінен қаладағы бейнебақылау камералары арқылы анықталды. Солардың бірі — Северный тұрғын үй кешенінің маңында болған оқиға. Темекі тұқылын көшеге лақтырған 35 жастағы ер адам №7 учаскелік полиция пунктінің бақылау камераларына түсіп қалды. Аға учаскелік инспектор заң бұзушылықты дер кезінде анықтап, ақпаратты патрульдік полиция қызметкерлеріне тапсырды. Нәтижесінде тұрғын әкімшілік жауапкершілікке тартылып, айыппұл төлеуге міндеттелді.
ҚР әкімшілік құқық бұзушылық туралы Кодексінің 434-2-бабына сәйкес, жалпы пайдалану орындарын ластағандарға 5 айлық есептік көрсеткіш мөлшерінде айыппұл салынады.
Петропавл қаласындағы барлық учаскелік полиция пунктері бейнебақылау жүйелерімен жабдықталған, ал №7 УПП-де 40-қа жуық камера бар. Бұл камералар қаланың әр бұрышында заң бұзушылықты дер кезінде анықтауға және тұрғындар арасында құқықтық тәртіпті нығайтуға мүмкіндік береді.
Жыл басынан бері жол жиектерінде, саябақтарда және басқа да қоғамдық орындарда құқықтық мәдениет деңгейінің төмендігінен 1116 тұрғын әкімшілік жазаға тартылды. Полицейлер құқық бұзушылыққа “мүлдем төзбеушілік” қағидатын басшылыққа алып, қоғамдық тәртіпті қадағалауды күшейтіп отыр.
