Ақмола облысында мас азамат отбасылық жанжал үшін әкімшілік қамауға алынды, - деп хабарлайды Polisia.kz.
Ақмола облысының Бурабай ауданындағы ауылдардың бірінде 32 жастағы азамат отбасындағы жанжалға байланысты әкімшілік жауапкершілікке тартылды. Бұрынғы жұбайына балағат сөздер айтып, құқық бұзғаны үшін бұған дейін де жауапкершілікке тартылған ер адам бұл жолы мас күйінде өз әкесін қорлап, дене жарақатын салған.
Оқиға 17 қарашада орын алды. Қарт кісі ұлының бұл әрекеттеріне қарамастан, жағдайдан шығудың жолын тауып, учаскелік полиция инспекторына телефон арқылы хабарласа алды. Полиция қызметкерлері жедел түрде оқиға орнына жетіп, құқық бұзушыны тоқтатып, оның медициналық тексерістен өтуін талап етті. Алайда, ер адам заңды талаптарға бағынудан бас тартып, қарсылық көрсетті.
талған жағдайға байланысты құқық бұзушыға ҚР Әкімшілік құқық бұзушылық туралы кодексінің 73-бабы (Отбасылық-тұрмыстық қатынастар саласындағы құқық бұзушылық) және 667-бабы (Полиция қызметкерлерінің заңды талаптарына бағынбау) бойынша әкімшілік хаттама толтырылды. Сонымен қатар, әкесін ұрып-соғу фактісі бойынша сот-медициналық сараптама тағайындалып, сотқа дейінгі тергеу басталды.
Айта кетейік, Қазақстан Республикасының Қылмыстық кодексіне енгізілген соңғы өзгерістер денсаулыққа зиян келтіру мен ұрып-соғуға байланысты жауапкершілікті күшейтуді қарастырады. Мәселен, денсаулыққа қасақана жеңіл зиян келтіргені үшін екі жылға дейін бас бостандығынан айыру жазасы көзделсе, ұрып-соғу немесе денсаулыққа жеңіл зиян келтірмеген зорлық-зомбылық әрекеттері үшін 50 тәулікке дейін қамауға алу жазасы қарастырылған.
