Жыл басынан бері Павлодар облысында 1331 мас жүргізуші ұсталды, – деп хабарлайды Polisia.kz.
Жол қозғалысындағы қауіпсіздік – тек ереже мен тәртіпті қатаң сақтау арқылы қамтамасыз етілетін маңызды талап. Өкінішке қарай, кейбір жүргізушілер көлікті мас күйінде айдап, өздері де, өзгелер де ауыр зардап шегетін жағдайларға себеп болып жатады.
Мұндай ережебұзушылықтың салдары қайғылы оқиғаларға әкеліп соғуы мүмкін. Соның бір мысалы – Павлодар облысының Тереңкөл ауданына қарасты Калинов ауылының оқиғасы. Ауылда полиция қызметкерлері Audi-80 көлігін тоқтатып, жүргізушіден күмәнді белгілер байқаған. Медициналық куәландыру нәтижесінде оның мас күйінде екені анықталды. Автокөлік мамандандырылған тұраққа қойылып, құқық бұзушыға қатысты тексеру жүргізіліп жатыр.
Полиция мәліметіне сәйкес, бұл жүргізуші өткен жылы да осындай құқық бұзушылық жасағаны үшін 7 жылға көлік жүргізу құқығынан айырылған. Алайда ол тәртіпке бағынбай, ережені екінші рет бұзды.
– Әр адам жақындарының, достарының және таныстарының көлік жүргізу кезінде мас күйде болмауын қадағалап, оларды тоқтатуы тиіс. Сондай-ақ мас жүргізушіні байқасаңыз, бұл туралы полицияға дереу хабарлаңыз, – деп атап өтті тәртіп сақшылары.
Жыл басынан бері Павлодар облысында 1331 мас жүргізуші ұсталды. Бұл аз сан емес. Осындай ережебұзушылықтардың салдарынан 20 жол-көлік оқиғасы тіркелді, оның нәтижесінде 4 адам көз жұмып, 28 адам түрлі жарақат алды.
Азаматтарға мас күйінде көлік басқарудың ауыр зардаптарын тағы бір еске саламыз: сіз бұл әрекетіңізбен тек өз өміріңізді емес, өзгелердің де өмірін қатерге тігесіз. Мас жүргізуші туралы ақпаратты 102 нөміріне немесе Police 102 мобильді қосымшасы арқылы хабарлауға болады.
Қоғамның әр мүшесі жолдағы қауіпсіздікті сақтау үшін өз жауапкершілігін сезініп, ережені қатаң ұстанғаны маңызды.
