Алматы облысында полицейлер зорлық-зомбылыққа қарсы меморандумға қол қойды, - деп хабарлайды Polisia.kz.
“Тұрмыс” жедел-профилактикалық іс-шарасы аясында Райымбек ауданының полицейлері Отбасын қолдау орталығымен бірлесіп, тұрмыстық зорлық-зомбылықтың алдын алуды күшейтуге бағытталған меморандумға қол қойды.
Құжат әлеуметтік мәселелерді тиімді шешу үшін мемлекеттік органдар, жергілікті өкілдер мен атқарушы құрылымдар арасындағы күш-жігерді үйлестіруді қарастырады. Негізгі назар мұқтаж отбасыларға көмек көрсетуге, дағдарыстық жағдайдан шығу бойынша кеңес беруге және халықтың өмір сүру деңгейін арттыруға бағытталған шараларды енгізуге аударылады.
Меморандумға қол қою әлеуметтік қорғау саласындағы бірлескен жұмысқа жаңа мүмкіндіктер ашады. Тараптар қиын өмірлік жағдайға тап болған отбасыларды қолдау, тұрмыстық зорлық-зомбылықтың алдын алу және қоғамдағы тұрақтылықты нығайтуға ықпал ететін бағдарламаларды іске асыру мәселелері бойынша тығыз ынтымақтастық орнатуға келісті.
– Жанұяларды қолдау орталығы мен құқық қорғау органдары арасындағы серіктестік халықтың осал санаттарымен жұмыстың тиімділігін арттыруға мүмкіндік береді. Әрбір қиындыққа тап болған отбасы қайда жүгінуге болатынын біліп, мемлекеттің қолдауын сезінуі маңызды. Бұл қадам азаматтардың құқықтарын қорғауға және әр отбасы үшін қолайлы жағдай жасауға бағытталған әлеуметтік бастамаларды одан әрі дамытуға негіз болады, – деп атап өтті полицейлер.
