Жамбыл облысында полицейлер 4,6 млн теңге қарызы бар жүргізушіні ұстады, – деп хабарлайды Polisia.kz.
Әкімшілік полиция қызметкерлері жол қозғалысы ережелерін бұзу туралы нұсқамаларды өңдеу кезінде Toyota Vellfire автокөлігін анықтады. Аталған көліктің 27 жастағы жүргізушісі жол қозғалысы ережелерін жүйелі түрде бұзатын азамат болып шықты. Соңғы екі ай ішінде ол Жамбыл облысында жылдамдық режимін 89 рет бұзып, жалпы сомасы 4,6 миллион теңге айыппұлға ие болған.
Тараз қаласының ПБ Жедел басқару орталығының бейнебақылау камералары арқылы жүргізілген іздестіру іс-шаралары барысында бұл көлік анықталып, облыс орталығының көшелерінде тоқтатылды.
Қазіргі уақытта автокөлік барлық айыппұлдары толық төленгенге дейін арнайы айып тұрағына қойылды.
Полиция жүргізушілерге жол қозғалысы ережелерін қатаң сақтауға шақырады және әрбір құқық бұзушылыққа міндетті түрде жауапкершілік қарастырылатынын еске салады.
