Ақтөбе облысы полиция департаментінің бастығының орынбасары Ғалым Байжанов пен Қ.Жұбанов атындағы Ақтөбе өңірлік университетінің проректоры Еркін Тастанқұлов өзара ынтымақтастық туралы меморандумға қол қойды, – деп хабарлайды Polisia.kz.
Жастардың цифрлық сауаттылығын дамыту және интернет-алаяқтыққа қарсы күресті күшейту мақсатында полиция мен университет өзара ынтымақтастық туралы меморандумға қол қойды.
Құжат аясында интернет-алаяқтықтың алдын алу, еріктілерден студенттік топтар құру және интернеттегі алаяқтықтың өзекті әдістеріне бірлескен зерттеулер жүргізу бойынша тұрақты ақпараттық науқандар ұйымдастырылады. Сонымен қатар студенттерге киберқауіпсіздік саласындағы департамент бөлімшелерінде оқу және өндірістік тәжірибеден өтуге мүмкіндік беріледі. Бұл болашақ мамандардың киберқылмысқа қарсы күрес бойынша аналитикалық және зерттеу жұмыстарына қатысуына жол ашады.
Меморандумға қол қою барысында полиция мен университет арасындағы әріптестік байланыстарды дамыту және бірлескен жұмыстың келешегі талқыланды. Сондай-ақ, департамент бастығының орынбасары студенттерге ішкі істер органдарының қызметі мен полицияның өзекті міндеттері туралы баяндап, оларды полиция бөлімшелерінде қызмет етуге шақырды.
