Павлодар облысында мас жүргізушілер анықталып, жауапкершілікке тартылды, - деп хабарлайды Polisia.kz.
Павлодар облысында жол қозғалысы қауіпсіздігін қамтамасыз ету және апаттық жағдайларды болдырмау мақсатында 19 сәуір мен 19 мамыр аралығында "Қауіпсіз жол" атты республикалық жедел-профилактикалық іс-шара басталды. Бұл кезеңде құқық қорғау органдары жол ережелерін бұзғандарды анықтап, құқықбұзушылықтардың алдын алу жұмыстарын күшейтті.
Іс-шараның алғашқы екі күнінің қорытындысы бойынша облыс аумағында жол қозғалысы ережесін бұзудың 451 дерегі тіркелді. Соның ішінде 18 жүргізуші мас күйінде рульге отырған. Мұндай жағдайлардың бірқатары Павлодар және Ақсу қалаларында болды. Мәселен, Естай көшесінде тоқтатылған Renault Logan автокөлігінің жүргізушісі медициналық тексеру нәтижесінде алкогольдік ішімдік ішкені анықталды. Ал Ақсу қаласында Mitsubishi Galant көлігін тізгіндеген азаматтың есірткілік мас күйде болғаны белгілі болды.
– Аталған фактілер бойынша тиісті әкімшілік хаттамалар толтырылып, материалдар сотқа жолданды. Заңбұзушылардың көліктері арнайы айып тұрағына қойылды, – дейді Павлодар облыстық полиция департаменті.
Сонымен қатар жаяу жүргіншілер тарапынан 116 құқық бұзушылық тіркелді. 83 жүргізуші қауіпсіздік белдігін тақпай, 25 адам жаяу жүргіншіге жол бермеген. 13 жүргізуші бағдаршамның тыйым салынған сигналына қарамастан жолды кесіп өткен. 11 көлік техникалық байқаудан өтпеген күйде қозғалысқа шыққаны анықталды. Барлығы 29 көлік айып тұрағына қойылып, 8 мемлекеттік тіркеу нөмірі тәркіленді.
– Жыл сайын жол ережелерін бұзғандарға қатысты жауапкершілік күшейіп келеді. Алайда өкінішке қарай, жолда өзге қатысушылардың өмірі мен қауіпсіздігіне немқұрайлы қарайтын азаматтар әлі де кездесуде. Мұндай салғырттық қайғылы оқиғаларға әкеп соқтыруы мүмкін, – дейді полиция департаменті өкілдері.
Полиция қызметкерлері жол қозғалысына қатысушыларды тәртіпті сақтауға, бір-біріне құрметпен қарауға шақырды.
– Жолдағы қауіпсіздік – ортақ жауапкершілік. Әр адам заңға мойынсұнып, ережені бұзбауға тырысса, апаттың алдын алуға мүмкіндік бар, – деп қорытындылады ведомство.
