Ішкі істер министрлігі қылмыстық жауапкершіліктен жалтаруға тырысқан адамдарды іздеу және ұстау бойынша белсенді жұмысты жалғастыруда, - деп хабарлайды Polisia.kz.
Биыл мамыр айында 140-тан астам адамның жүрген жері анықталып, ұсталды, оның сегізі шетелде құрықталған.
Алматы қаласында Түркістан облысының екі тұрғыны ұсталды. Олар Арыс ауданында жергілікті тұрғыннан 3,4 млн теңгеден астам қаржы мен автокөлікті күш қолдану арқылы бопсалаған.
Сонымен қатар Жамбыл облысы полиция департаментімен және Өзбекстан ІІМ қызметкерлерінің көмегімен Ташкент қаласында 22 жастағы тараздық тұрғын ұсталды. Ол 2022 жылдың соңында танысын алдап, жалпы құны 24 млн теңгеден астам төрт автокөлікті иемденіп, кейін оларды үшінші тұлғаларға сатып жіберген.
Қылмыскерлерді іздеу және қоғамдық тәртіпті қамтамасыз ету жұмыстары тұрақты негізде жалғасуда және ведомство бақылауында.
