Қазақстан-Британ университетінде Қазақстан Республикасының Конституциясына 30 жыл толуына арналған салтанатты шара өтті, – деп хабарлайды Polisia.kz.
Іс-шараның ерекше мәні – дәл осы ғимаратта, бұрынғы Үкімет үйінде, еліміздің Тәуелсіздігі мен негізгі заңы туралы тарихи құжаттар қабылданған болатын. Салтанатты жиынға Алматы қаласының полиция басшылары мен қызметкерлері, ішкі істер органдарының ардагерлері және жас офицерлер қатысты. Осы күні полиция департаментінің үздік қызметкерлері ведомстволық марапаттарға ие болып, жас офицерлерге алғашқы офицерлік шендері табысталды.
Сонымен қатар полиция ардагерлеріне алғыс айтылып, қызметтік міндетін атқару кезінде қаза тапқан қызметкерлердің рухына тағзым етілді.
- Конституция – бұл Тәуелсіздігіміздің құқықтық іргетасы ғана емес, сонымен қатар халқымыздың бірлігінің нышаны. Біз, полиция қызметкерлері Конституцияда бекітілген Заң мен тәртіптің сақшысымыз. Азаматтардың құқықтары мен бостандықтарын қорғау – біздің басты міндетіміз әрі қасиетті борышымыз, – деді Алматы қаласы полиция департаментінің бастығы Арыстанғани Заппаров.
Алматыда учаскелік инспекторлардың кәсіби мерекесі аталып өтті. Шара барысында қала полициясының бастығы Арыстанғани Заппаров олардың қоғамдағы рөліне ерекше тоқталды.
– Учаскелік инспектор – халыққа ең жақын полиция қызметкері. Оның жұмысы адалдықты, төзімділікті және жоғары жауапкершілікті талап етеді. Азаматтардың сенімі – біздің қызметіміздің басты көрсеткіші, – деді шаһардың бас полицейі.
Заппаровтың айтуынша, Алматыда полиция жұмысының сапасын арттыру үшін жүйелі шаралар жүзеге асырылуда. Атап айтқанда, материалдық-техникалық база жаңартылып, ғимараттарға күрделі жөндеу жүргізілген. Сонымен қатар қызметкерлер үшін заманауи спорт залы салынды.
Іс-шара соңында ПД басшысы ішкі істер органдарының ардагерлеріне қызметке адалдығы үшін алғыс білдіріп, барлық полицейге қоғамдық қауіпсіздікті қамтамасыз етудегі еңбектеріне табыс тіледі.
