Қостанай облысында электронды білезік көмегімен пробация бақылауының тиімділігі артты, - деп хабарлайды Polisia.kz.
Қостанай облысында пробация қызметтерінде есепте тұрған азаматтарға бақылауды күшейту жұмыстары жүйелі түрде жүргізілуде. Электронды бақылау құралдарын пайдалану нәтижесінде пробациялық бақылау шарттарын бұзудың 186 дерегі тіркелді.
Қостанай облысы бойынша қылмыстық-атқару жүйесі департаментінің мәліметінше, электронды білезіктер пробация есебінде тұрған тұлғалардың қозғалысын тәулік бойы бақылауға мүмкіндік береді. Бұл құралдар белгіленген шектеулердің бұзылуын автоматты түрде тіркейді — мысалы, рұқсат етілген аумақтан өз бетімен шығу немесе тұрғылықты мекенжайда болу тәртібін сақтамау сияқты жағдайлар.
— Электронды бақылау құралдарын қолдану бақылаудың тиімділігін едәуір арттырады және қылмыстың қайталану қаупін азайтады. Әрбір бұзушылық фактісі бойынша тексеріс жүргізіліп, нәтижесіне қарай тиісті шаралар қабылданады — ескерту жасаудан бастап, материалдарды сотқа жолдауға дейін, — деді пробация қызметтерін басқару бөлімінің басшысы.
Ведомство деректеріне сәйкес, анықталған құқық бұзушылықтардың басым бөлігі уақыттық шектеулерді сақтамау және қозғалыс маршрутын бұзу фактілеріне қатысты болған. Бірнеше жағдайда жазаны қатаң түріне ауыстыру туралы материалдар сотқа жіберілді.
Электронды бақылау жүйесін кеңінен қолдану пробация қызметінің тиімділігін арттырып, қоғамдық қауіпсіздікті қамтамасыз етуге елеулі үлес қосып отыр.
