Алматы қаласында жол қауіпсіздігін қамтамасыз ету және көлік құралдарын тоқтату мен тұраққа қою қағидаларын бұзу салдарынан туындайтын кептелістерді азайту бағытындағы жүйелі жұмыс жалғасып жатыр, – деп хабарлайды Polisia.kz.
Қала әкімдігімен өзара іс-қимыл аясында жол қауіпсіздігін нығайту және заңсыз тұрақ фактілеріне жедел әрекет ету мақсатында "Алматы Паркинг" ЖШС-ға тиесілі 30 эвакуатор жұмылдырылды. Сонымен қатар полиция бөлімшелері жол қозғалысы ережелерін бұза отырып қойылған көлік құралдарын мамандандырылған айыппұл тұрағына жеткізетін 20 арнайы эвакуаторды пайдаланады.
Атқарылып жатқан жұмыстың негізгі мақсаты – жолдың жүру бөлігін босату, қоғамдық және жедел қызмет көліктерінің кедергісіз қозғалысын қамтамасыз ету, жол-көлік оқиғаларының алдын алу және жол қозғалысына қатысушылардың тәртібін арттыру.
Қосымша техниканы тартудың алғашқы күнінде-ақ тоқтату және тұраққа қою қағидаларын бұза отырып қойылған 25-тен астам көлік арнайы айыппұл тұрағына жеткізілді. Жіберілген құқық бұзушылықтар үшін 56 жүргізуші жауапкершілікке тартылды.
Әсіресе, көлік ағыны жоғары учаскелерге, азаматтар көп шоғырланатын орындарға, сондай-ақ дұрыс қойылмаған көлік қозғалысқа кедергі келтіріп, қауіп төндіретін көшелерге басымдық берілуде.
– Эвакуаторлардың жұмысы ең алдымен, жол қозғалысы қауіпсіздігін қамтамасыз етуге және апатты жағдайлардың алдын алуға бағытталған. Дұрыс қойылмаған көлік – барлық жол қозғалысына қатысушы үшін тәуекел факторы. Қалалық қызметтер ұсынған эвакуаторлар жолдағы тәртіпті қамтамасыз ету үшін ғана пайдаланылады. Біздің міндетіміз – жүргізушілердің жол қозғалысы ережелерін сақтау қажеттігін түсінуіне ықпал етіп, қауіпсіз әрі жайлы қалалық орта қалыптастыру, – деді Алматы қаласы полиция департаменті әкімшілік полиция басқармасының бастығы Серик Шумаев
