Абай облыстық ҚАЖД-ның әйелдер колониясында "Ең үздік қабырға газеті" байқауы өтті, – деп хабарлайды Polisia.kz.
Абай облысы бойынша қылмыстық-атқару жүйесінің әйелдер колониясында жаңа жыл мерекесіне орай ұйымдастырылған іс-шаралар аясында сотталғандар арасында "Ең үздік қабырға газеті" атты шығармашылық байқау өткізілді.
Іс-шараның негізгі мақсаты – сотталғандардың бос уақытын мазмұнды ұйымдастыру, олардың шығармашылық әлеуетін дамыту, сондай-ақ жағымды эмоциялық ахуал қалыптастырып, арнайы контингент арасында қолайлы әлеуметтік-психологиялық климатты нығайту болды.
Байқауға мекеменің бес жасағынан қырықтан астам сотталған әйел қатысты. Әр жасақ ұжымдық жұмыс пен қатысушылардың белсенділік деңгейін көрсететін көркем және әдеби элементтерді пайдалана отырып, жаңа жылдық тақырыпта қабырға газетін дайындады.
Іс-шара барысында сотталғандар вокалдық және хореографиялық нөмірлерді, сондай-ақ театрландырылған қойылым элементтерін қамтитын концерттік бағдарламалар ұсынды. Бұл олардың шығармашылық қабілеттерін ашуға және мәдени деңгейін арттыруға бағытталды.
Байқау қорытындысы бойынша командалар "Ең үздік сурет", "Ең мазмұнды қабырға газеті", "Ең креативті жұмыс", "Ең үздік мерекелік безендіру" және "Көрермендер көзайымы" номинациялары бойынша марапатталды. Жеңімпаздарға мекеме әкімшілігі тарапынан алғыс хаттар мен естелік сыйлықтар табысталды.
— Осындай іс-шараларға қатысу бос уақытты тиімді ұйымдастыруға мүмкіндік береді, шығармашылық дағдыларды дамытуға ықпал етіп, сотталғандардың эмоциялық жағдайына оң әсер етеді, — деп бөлісті сотталғандардың бірі.
— Мәдени тәрбиелік іс-шараларды өткізу сотталғандардың әлеуметтік бейімделуіне, жеке тұлғалық әлеуетін дамытуға және заңға бағынатын мінез-құлық қалыптастыруға ықпал етеді. Бұл, жалпы алғанда, оларды түзету үдерісіне оң әсерін тигізеді, — деп атап өтті сотталғандармен тәрбиелік және әлеуметтік-психологиялық жұмыс бөлімі жасағының бастығы Айнұр Искакова.
Айта кету керек, мекемеде сотталғандарды қайта әлеуметтендіруге және құқықтық тәртіпті нығайтуға бағытталған мәдени-тәрбиелік және профилактикалық іс-шаралар жүйелі түрде жүзеге асырылып келеді.
