Абай облысы бойынша ҚАЖД мекемесінде айтыс ұйымдастырылды, - деп хабарлайды Polisia.kz.
Абай облысында ерекше рухани шара өтті – №21 мекеме қызметкерлері арасында ұйымдастырылған айтыс көпшіліктің көңілінен шығып, ұлттық өнерге деген құрметтің биік екенін тағы бір дәлелдеді. Домбыраны құлағында ойнаған, сөз саптауы көркем, шешендігімен ерекшеленген қызметкерлер “әй демейтін қазақ жоқ” деген нақылды шынайы әрекеттерімен дәлелдеп берді.
Айтыс Абай Құнанбайұлының 180 жылдық мерейтойына орай ұйымдастырылды. Қазақтың бас ақынына деген құрмет тек ресми жиындармен шектеліп қалмай, осындай дәстүрлі өнер түрлерімен жалғасын тауып жатқаны қуантады. Бұл – ұлтымыздың төл өнеріне, сөз құдіретіне деген құрметтің көрінісі ғана емес, сондай-ақ, ұрпаққа өнеге болатын игі бастама.
Айтысқа қатысқан қызметкерлер тек өнерлерін ғана емес, парасат-пайымын, ұлттық болмысқа деген жанашырлығын, Абай мұрасына деген ілтипатын да көрсете білді. Терең мағыналы сөздер, өткір әзіл, шынайы мақам – барлығы осы кештің айрықша есте қалуына себеп болды.
Ұйымдастырушылардың айтуынша, мұндай шаралар алдағы уақытта дәстүрлі түрде жалғасын табатын болады. Бұл – тек бір мекеменің ғана емес, бүкіл аймақтың рухани өсуіне ықпал ететін қадам.
Абайдың “толық адам” ілімін өміріне бағдар еткен әрбір қазақ баласы үшін мұндай бастамалар – тек мәдени шара ғана емес, ұлттық сананы жаңғыртудың тиімді тетігі. №21 мекеме қызметкерлерінің бастамасы – көпке үлгі боларлықтай.
Айтыстың қорытындысы бойынша, үздік ақындар марапатталып, естелік сыйлықтармен және алғыс хаттармен марапатталды. Бірақ ең бастысы – көрермен жүрегінен орын алған рухани әсер, ұлттық өнерге деген жаңа серпін.
