Абай облысы бойынша ҚАЖД мекемесінде студенттерге арналған ашық есік күні өтті, - деп хабарлайды Polisia.kz.
Қылмыстық-атқару жүйесі күніне орай Абай облысы бойынша ҚАЖД-ның қауіпсіздігі жоғары мекеме қызметкерлері Семей қаласындағы Алихан Бөкейхан атындағы университеттің заң факультеті студенттері үшін ашық есік күнін ұйымдастырды.
Екінші және үшінші курстарда оқитын жиырмадан астам студент өз жетекшісі Виктория Султановамен бірге мекеме аумағын аралап, режимдік аймақтармен, оқу сыныптарымен, өндірістік нысандармен және қауіпсіздік пен тәртіпті қамтамасыз ететін бөлімшелермен танысты. Қонақтар тарапынан ерекше қызығушылық тудырған нысан — жақында ашылған онлайн-дүкен болды.
Мекеме бастығының тәрбие жөніндегі орынбасары Айдын Калелов қылмыстық-атқару жүйесінің негізгі міндеттері мен қызмет бағыттары туралы кеңінен баяндап, студенттердің қызмет ерекшеліктері, жазаларды орындаудың құқықтық қырлары, сондай-ақ ҚАЖ қызметкерлерінің сот және құқық қорғау органдарымен өзара іс-қимылы жөніндегі сұрақтарына жауап берді.
Экскурсия студенттерге қылмыстық-атқару жүйесінің жұмысын ішінен көруге мүмкіндік берді.
- Біз кәсіби өсуіміз үшін маңызды әрі пайдалы ақпарат алдық. Осындай таныстықтан кейін ҚАЖ жүйесінде қызмет етуге деген қызығушылығымыз одан әрі артты, — деді заң факультетінің студенті.
- ҚАЖД жүйесіндегі қызмет — тек қатаң тәртіп пен жоғары жауапкершілік қана емес, сонымен қатар кәсіби білім мен құзыреттерді қажет ететін сала. Қызметке қызығушылық танытып, болашағын осы жүйемен байланыстыруды ойлаған студенттерді көргенімізге қуаныштымыз, — деді мекеме бастығы Аслан Нұрбеков өз сөзінде.
Алдағы уақытта мекеме қызметкерлері жастармен жұмыс жүргізуді және ашықтықты арттыруға бағытталған іс-шараларды жалғастыруды жоспарлап отыр. Қылмыстық-атқару жүйесі күні қарсаңында өткен бұл кездесу жас заңгерлер үшін кәсіби қалыптасуға жасалған маңызды қадам болып, құқық қорғау саласының нақты міндеттерімен жақынырақ танысуға және болашақ мамандыққа деген қызығушылықты арттыруға мүмкіндік берді.
