Абай облысында 1300-ден астам жүргізуші қауіпсіздік белдігін тақпағаны үшін жазаланды, - деп хабарлайды Polisia.kz.
Күн сайын жедел басқару орталығының бейнекамералары жол қозғалысы ережелерінің бұзылуын тіркейді. Ең жиі анықталатын құқық бұзушылықтардың бірі – қауіпсіздік белдігін тақпай көлік жүргізу. Жыл басынан бері Абай облысында осы себеппен 1338 жүргізуші әкімшілік жауапкершілікке тартылды.
Қауіпсіздік белдігі – өмірді сақтап қалудың маңызды кепілі. Статистикаға сәйкес, белдік таққан жүргізушінің аман қалу мүмкіндігі екі есе жоғары. Дегенмен көптеген азаматтар бұл қарапайым ережені елемей, өз өмірлерін қатерге тігуде.
ЖБО бейнебақылау жүйесі ереже бұзушылықтарды автоматты түрде анықтап, деректерді жүйеге жібереді, содан кейін жүргізушіге әкімшілік айыппұл салынады. Сонымен қатар жолдарда патрульдік полиция экипаждары қызмет атқарып, жол қозғалысы ережелерінің сақталуын тікелей қадағалауда.
Қолданыстағы заңнамаға сәйкес, бұл құқық бұзушылық үшін жүргізушіге айыппұл қарастырылған. Алайда жолдағы бір секундтік немқұрайдылық қайғылы жағдайға әкелуі мүмкін. Осыған байланысты Абай облысы полиция департаменті жүргізушілер мен жолаушыларды жолда қауіпсіздік белдігін тағуға шақырады. Ұзақтығына қарамастан, әр сапар кезінде белдік тағу – өз өміріңіз бен денсаулығыңызды қорғаудың кепілі.
Өз қауіпсіздігіңізді сақтаңыз және жол қозғалысы ережелерін қатаң сақтаңыз!
