Абай облысында әкесі туған қызына алимент төлемей, 2 млн теңгеден астам қарыз болып қалған, - деп хабарлайды Polisia.kz.
36 жастағы Аягөз қаласының тұрғыны өзінің 5 жасар қызына 2 млн теңгеден астам қарызданған.
- Кәмелетке толмаған баласының құқығын бұзып, Аягөз тұрғыны бас бостандығынан шектеу жазасына кесіліп, жазаның бүкіл мерзімі бойы бір жүз сағатқа мәжбүрлі еңбекке тартылды. Жазаны өтеу үшін ол Аягөз аудандық пробация қызметінің есебіне қойылып, қаладағы кәсіпкерлердің бірінде жұмыс істейді. Қазіргі уақытта ол тапқан табысының бір бөлігін берешегін өтеуге жұмсап жатыр, ал берешектің бір бөлігі өтелген, - дейді Аягөз аудандық пробация қызметінің бастығы Ислам Дюсембеков.
Сотталған ер адам өзінің жасаған әрекетіне өкінетінін айтып, былай деді: "Әйелім екеуміз екі жыл бұрын ажырасып кеттік, қызым сол кезде 3 жаста болды. Ақша тауып жүрдім, бірақ қызыма ақша бергім келмеді. Әйелім өзі де қиындықтан шығады деп ойладым, содан кейін қаражатымды беремін деп жүрдім, алайда берешек тек көбейді. Қазіргі уақытта тұрақты ақылы жұмысқа орналастым, отбасыммен қайта қосылғым келеді."
Бұл жағдай қоғамға әкелердің өз балаларына деген жауапкершілігі мен қамқорлығының маңыздылығын еске салады.
