Жыл басынан бері Абай облысында қоғамдық орындарда алкоголь ішкені үшін 1600-ден астам азамат жауапкершілікке тартылды, — деп хабарлайды Polisia.kz.
Осы жылдың басынан бері Абай облысында 1641 азамат қоғамдық орындарда алкогольдік ішімдік ішкені үшін әкімшілік жауапкершілікке тартылды. Бұзушылықтар полиция қызметкерлері жүргізген алдын алу рейдтері барысында анықталды.
Қоғамдық орындарда алкоголь ішу – қоғамдық тәртіп пен қауіпсіздікке теріс әсер ететін кең таралған құқық бұзушылықтардың бірі. Қазақстан Республикасының әкімшілік құқық бұзушылық туралы кодексінің 440-бабына сәйкес, бұл әрекет үшін бес айлық есептік көрсеткіш мөлшерінде айыппұл қарастырылған, ал қайталанған жағдайда қатаң жаза қолданылады.
Абай облысының полициясы осындай құқық бұзушылықтардың алдын алуға бағытталған профилактикалық жұмыстарды тұрақты түрде жүргізеді. Тәртіп бұзушыларды анықтаумен қатар, халық арасында қоғамдық орындарда алкоголь ішуге жол бермеу туралы түсіндіру жұмыстарына да баса назар аударылады.
— Қоғамдық қауіпсіздік – баршамыздың ортақ жауапкершілігіміз. Азаматтарды заң талаптарын сақтауға және айналасындағыларға құрметпен қарауға шақырамыз. Қоғамдық орындарда алкоголь ішу тек тәртіпті бұзып қана қоймай, құқық бұзушылардың өздері үшін де қауіп төндіреді, – деп атап өтті Абай облысы полиция департаменті жергілікті полиция қызметі басқармасының бастығы Асет Өтепов.
Полиция өңір тұрғындарын қоғамдық тәртіпті бұзу фактілері туралы хабарлауға шақырады және ережелерді сақтау барлық азаматтар үшін қолайлы әрі қауіпсіз орта қалыптастыруға ықпал ететінін еске салады.
