Абай облысында Конституция күніне орай ардагерлер мен жас полицейлердің тағылымды кездесуі өтті, - деп хабарлайды Polisia.kz.
Абай облысы полиция департаментінде Қазақстан Республикасының Конституция күніне арналған ардагерлер мен жас қызметкерлердің мазмұнды кездесуі өтті. Бұл шараның басты мақсаты – ұрпақтар сабақтастығын нығайтып, құқық қорғау саласында қызмет ететін әр буынның тәжірибесі мен жаңашыл көзқарасын үйлестіру.
Кездесу барысында департамент бастығының орынбасары, полиция полковнигі Аблай Нұрымов құттықтау сөз сөйлеп, Конституцияның мемлекеттің тұрақтылығы мен азаматтардың құқықтары мен бостандықтарының негізгі кепілі екенін атап өтті. Ол тәртіп сақшыларының заң талаптарын адал орындауы мен қоғам алдындағы жауапкершілікті сезінуінің маңыздылығын ерекше атап көрсетті.
Іс-шараның ең жауапты сәттерінің бірі – жас қызметкерлерге алғашқы қызметтік куәліктердің табысталуы болды. Бұл олардың құқық қорғау саласындағы ресми қадамы әрі көрсетілген үлкен сенімнің белгісі саналды. Ардагерлер куәліктерді өз қолдарымен тапсырып, тәжірибелерімен бөлісіп, жас мамандарға кәсіби кеңестерін айтып, өмірлік ұстанымдарын жеткізді.
Бұл кездесу – өткен мен бүгінді жалғаған, тәжірибе мен жігерді ұштастырған маңызды оқиға. Конституция күніне арналған шара жас қызметкерлер үшін кәсіби жолдастық пен сенімнің, ал ардагерлер үшін құрмет пен ізеттіліктің айқын көрінісіне айналды.
