Абай облысында нашақорлықпен және есірткі қылмыстарымен күрес шаралары талқыланды, — деп хабарлайды Polisia.kz.
Абай облысында нашақорлық және есірткі бизнесіне қарсы іс-қимыл жөніндегі ведомствоаралық штабтың отырысы өтті. Жиынға облыс әкімінің орынбасары Гариков Дмитрий Александрович төрағалық етті. Талқылауға мемлекеттік органдардың, құқық қорғау құрылымдарының және қоғамдық ұйымдардың өкілдері қатысты. Штаб жұмысына Абай облысы полиция департаменті бастығының бірінші орынбасары Байбусунов Дюсембай да қатысты.
Есірткі қылмысына қарсы іс-қимыл басқармасының бастығы Камза Тілек есірткі қылмыстарын анықтау және жолын кесу бойынша жүргізілген жедел жұмыстың нәтижелері, сондай-ақ жастар арасында профилактикалық шаралар туралы баяндама жасады.
Кездесуде ведомствоаралық өзара іс-қимылды күшейту, есірткінің заңсыз айналымын бақылауды қатаңдату және алдын алудың жаңа әдістерін енгізу мәселелеріне ерекше назар аударылды. Әсіресе, өскелең ұрпақ арасында түсіндіру жұмыстарын жүргізу және азаматтардың есірткінің зияны туралы хабардарлығын арттыру мәселесі басты назарға алынды.
Есірткі қылмысына қарсы күрес құқық қорғау органдарының басым міндеттерінің бірі болып қала береді. Бұл бағытта олар белсенді жұмыстарын жалғастырып, қоғамды бірлескен алдын алу бастамаларына тартуда.
