Абай облысында студенттерге қауіпсіздік ережелері мен құқықтық сауаттылық негіздері түсіндірілді, — деп хабарлайды Polisia.kz.
Абай облысында онлайн кеңес өтті. Оған Абай облысы полиция департаментінің, Төтенше жағдайлар департаментінің, Сыбайлас жемқорлыққа қарсы іс-қимыл агенттігі департаментінің, Білім басқармасының өкілдері және өңірдегі барлық колледждердің шамамен 8 мың студенті қатысты.
Кеңес барысында жаз мезгіліне тән қауіптер – өрт, суға кету жағдайлары және өзге де төтенше жағдайлар талқыланды. Студенттерге төтенше жағдайлар кезінде өз өмірін және айналасындағылардың қауіпсіздігін сақтау үшін қажетті нақты ұсынымдар берілді.
Сыбайлас жемқорлық құқық бұзушылықтарының алдын алу мәселесіне ерекше назар аударылды. Жастарға жазғы емтихан кезеңінде сыбайлас жемқорлық тәуекелдері артатыны ескертіліп, бір ғана қателік бүкіл болашаққа кері әсер етуі мүмкін екені айтылды. Іс-шараның басты мақсаты – құқықтық сауаттылықты арттыру, сыбайлас жемқорлыққа қарсы ойлау жүйесін қалыптастыру және жас ұрпақты адалдыққа тәрбиелеу.
Кездесу барысында киберқауіпсіздік мәселесі жеке блок ретінде қарастырылды. Интернет-алаяқтық қазіргі жастар үшін ең елеулі қауіптердің біріне айналып отыр. Студенттерге жеке деректерді қорғау жолдары мен онлайн қауіптерден сақтану тәсілдері түсіндірілді.
Нашақорлықтың алдын алу мәселесіне де ерекше назар аударылды. Жастарға тыйым салынған заттарды сақтау мен таратқаны үшін қылмыстық және әкімшілік жауапкершілік қарастырылатыны ескертілді. Сондай-ақ, есірткі заттарының денсаулық пен болашаққа тигізетін зияны туралы ақпарат берілді. Қатысушыларға мұндай жағдайларға тап болған кезде не істеу керектігі жөнінде нақты әрекет алгоритмдері түсіндірілді. Жас ұрпақтың саналы таңдау жасап, болашағына жауапкершілікпен қарауының маңыздылығы атап өтілді.
Сұрақ-жауап сессиясы барысында қатысушылар өздерін қызықтырған тақырыптар бойынша түсініктеме алып, мемлекеттік құрылымдармен сенімді байланыс орнатуға мүмкіндік алды. Бұл – қауіпсіз болашақ құруға бағытталған маңызды қадам.
