Абай облысының полицейлері боранды күні жолдан шығып кеткен жүргізушіге көмек көрсетті, - деп хабарлайды Polisia.kz.
Қыс мезгілі – жолға шыққан әрбір жүргізуші үшін жауапкершілігі жоғары кезең. Әсіресе боран соғып, көктайғақ күшейген уақытта трассада қозғалу қауіп деңгейін бірнеше есе арттырады. Осындай күрделі жағдайда Абай облысы аумағындағы Алматы – Өскемен автожолының 874-шақырымында Priora автокөлігі қолайсыз ауа райының салдарынан жол жиегіне шығып кеткен.
Қалың қар мен тайғақ жол көлікті басқаруды қиындатып, жүргізуші күрделі жағдайға тап болды. Дәл осы сәтте аталған бағытта патрульдік қызмет атқарып жүрген полиция қызметкерлері жол жиегінде тұрған көлікті байқап, бірден көмек көрсетуге кірісті.
Тәртіп сақшылары уақыт оздырмай, қолдарына күрек алып, көлік дөңгелектерінің маңындағы қарды тазалады. Қатты аяз бен екпінді желге қарамастан, олар көлікті қар құрсауынан шығарып, қауіпсіз жол бөлігіне жеткізді. Сонымен қатар полиция қызметкерлері жүргізушінің жағдайын сұрап, көліктің техникалық жарамдылығына көз жеткізді.
Жедел әрі үйлесімді әрекеттің нәтижесінде автокөлік қайтадан жолға шығып, жүргізуші сапарын жалғастырды. Азамат көрсетілген көмек үшін полиция қызметкерлеріне шынайы алғысын білдірді.
Осындай жағдайлар тәртіп сақшыларының қызметі тек жол қозғалысын бақылаумен шектелмейтінін көрсетеді. Қандай ауа райы болмасын, олар жол үстіндегі әрбір азаматтың қауіпсіздігін қамтамасыз етіп, қиын жағдайда қалғандарға дер кезінде қолдау көрсетеді.
