Абай облысында полицейлер қызметтік иттердің көмегімен пошта сәлемдемелерін тексерді, - деп хабарлайды Polisia.kz.
Абай облысында есірткі қылмысына қарсы іс-қимыл басқармасының және кинологиялық қызмет орталығының қызметкерлері ерекше әрі маңызды іс-шара өткізді – «Қазпошта» АҚ облыстық бөлімшесінде сәлемдемелер тексерілді. Бұл операцияның басты кейіпкерлері арнайы үйретілген қызметтік-іздестіру иттері болды.
Тексерудің мақсаты – пошта арқылы тасымалдануы мүмкін есірткілерді, психотроптық заттар мен прекурсорларды анықтау және олардың контрабандасының алдын алу. Мұндай профилактикалық шаралар заңсыз айналымдағы тыйым салынған заттардың кез келген тасымалына тосқауыл қоюға бағытталған.
Қызметтік иттердің жұмысы ерекше таңданыс тудырады: олар иістерді керемет дәлдікпен талдап, әрбір сәлемдемені тексереді. Иттердің еңбегі мен полицейлердің үйлесімді жұмысының арқасында аймаққа есірткі заттарының келуі айтарлықтай азайған.
«Қазпошта» АҚ филиалында жүргізілген тексеру барысында күмәнді заттар анықталған жоқ. Тіпті, 2024 жыл бойы Абай облысында пошта арқылы есірткі контрабандасы тіркелмеген.
