Абай облысында полицейлер тасжолда көлігі бұзылған әйелге көмектесті, - деп хабарлайды Polisia.kz.
Абай облысында полиция қызметкерлері тас жолда көлігі бұзылып қалған жүргізушіге дер кезінде көмек көрсетті.
Оқиға Семей - Ресей бағытындағы тасжолда болған. Әйел адам тізгіндеген Toyota автокөлігі техникалық ақауға байланысты жүре алмай қалып, жүргізуші жол жиегіне тоқтауға мәжбүр болған. Жолда жалғыз қалған жүргізуші полиция қызметкерлерінен көмек сұраған.
Жақын маңда жүрген патрульдік полиция ротасының қызметкерлері шақыртуға жедел жетіп келді. Тәртіп сақшылары көліктің жағдайын тексеріп, оның техникалық ақауға байланысты қозғала алмай тұрғанын анықтады. Қарқынды қозғалыс бар учаскеде тұрған көлік өзге жүргізушілер үшін де қауіп төндіруі мүмкін болғандықтан, полицейлер бірден көмек көрсетуге кірісті.
Полиция қызметкерлері автокөлікті арнайы арқанмен тіркеп, оны сүйреп Семей қаласына дейін жеткізіп берді. Осылайша жолда қалған жүргізушіге дер кезінде көмек көрсетіліп, ол қауіпсіз түрде қалаға жетті.
Жүргізушінің айтуынша, көлігі күтпеген жерден істен шығып, жолда жалғыз қалған сәтте қатты алаңдаған.
- Жолда келе жатқанда көлігім аяқ астынан тоқтап қалды. Қайта-қайта оталдырмақ болғаныммен жүрмеді. Жалғыз қалған соң біраз уайымдадым. Содан кейін полицияға хабарластым. Патрульдік полиция қызметкерлері тез арада келіп, жағдайымды түсініп, көмектесті. Көлігімді Семей қаласына дейін сүйреп апарып берді. Осындай көмектері үшін үлкен алғысымды білдіремін, – деді жүргізуші.
Патрульдік полиция қызметкерлерінің айтуынша, жолда қиын жағдайға тап болған азаматтарға көмек көрсету – олардың күнделікті қызметінің бір бөлігі. Сондай-ақ олар жүргізушілерге жолға шығар алдында автокөліктің техникалық жағдайын тексеріп алуды, ал күтпеген жағдай туындаған кезде сабыр сақтап, полицияға немесе тиісті қызметтерге хабарласуды ескертеді.
Айта кетейік, тәртіп сақшылары жол қозғалысы қауіпсіздігін қамтамасыз етумен қатар, жолда қиындыққа тап болған азаматтарға тұрақты түрде қолдау көрсетіп келеді. Осындай жедел әрекеттердің арқасында жүргізушілер дер кезінде көмек алып, қауіпсіз жерге жеткізіледі.
