Абай облысы полиция департаменті қоғамдық қауіпсіздік басқармасы бастығының орынбасары Мейірбек Нұрекенов Абай облысы өңірлік коммуникациялар қызметінде өткен кездесуде барысында вейптердің зияны мен олардың заңнамалық жауапкершілігі туралы кеңінен айтып өтті, - деп хабарлайды Polisia.kz.
Қазақстанда қоғамдық денсаулықты қорғау және жас ұрпақты зиянды әдеттердің ықпалынан сақтау – мемлекеттік саясаттың маңызды бағыттарының бірі. Осы мақсатта қабылданған жүйелі шаралардың бірі ретінде 2024 жылғы 20 маусымнан бастап елімізде электрондық тұтыну жүйелерінің, яғни вейптердің айналымына толық заңнамалық тыйым енгізілді.
Бұл шешім ең алдымен халықтың, әсіресе жастардың денсаулығын сақтау, никотин өнімдерінің таралуын шектеу және зиянды тәуелділіктің алдын алу мақсатында қабылданды.
Вейп – құрамында никотині бар немесе никотинсіз сұйықтықты қыздыру арқылы аэрозоль (бу) түзетін электрондық құрылғы. Мұндай құрылғылар электрондық темекі түріне жатады және бу арқылы никотин мен өзге де химиялық заттарды адам ағзасына жеткізеді. Мамандардың айтуынша, бұл өнімдер адам денсаулығына айтарлықтай зиян келтіруі мүмкін.
Қазақстан Республикасының Қылмыстық кодексінің 301-1-бабына сәйкес шегілмейтін темекі бұйымдарының, электрондық тұтыну жүйелерінің (вейптердің), сондай-ақ оларға арналған хош иістендіргіштер мен сұйықтықтардың айналымына қатысты қылмыстық жауапкершілік қарастырылған.
Аталған бапқа сәйкес:
1-бөлігі (сату және тарату):
200 АЕК-ке дейін (865 000 теңгеге дейін) айыппұл;
түзеу жұмыстары;
қоғамдық жұмыстар;
немесе 50 тәулікке дейін қамауға алу.
2-бөлігі (әкелу және өндіру):
2000 АЕК-ке дейін (8 650 000 теңгеге дейін) айыппұл;
2 жылға дейін бас бостандығын шектеу;
немесе бас бостандығынан айыру;
мүлікті тәркілеу мүмкін.
3-бөлігі (ауырлататын жағдайлар): Егер құқық бұзушылық:
қылмыстық топпен жасалса;
аса ірі мөлшерде кіріс алумен байланысты болса;
бірнеше рет қайталанса,
онда келесі санкциялар қолданылады:
5000 АЕК-ке дейін айыппұл;
5 жылға дейін бас бостандығынан айыру.
Қазақстан Республикасының аумағында төмендегі әрекеттерге толық тыйым салынған: вейптерді өндіруге;
оларды импорттауға (жеке пайдалану үшін де);
көтерме және бөлшек саудаға;
таратуға;
жарнамалауға;
коммерциялық айналымға енгізуге.
2026 жылғы мәліметтерге сәйкес, Абай облысында Қазақстан Республикасы Қылмыстық кодексінің 301-1-бабы бойынша бірде-бір қылмыстық құқық бұзушылық тіркелмеген. Бұл өңір тұрғындарының заң талаптарын жауапкершілікпен сақтап отырғанын және профилактикалық жұмыстардың тиімді жүргізіліп жатқанын көрсетеді.
Қоғамдық денсаулық – ұлт болашағының кепілі. Сондықтан әрбір азамат заң талаптарын сақтап, зиянды әдеттердің алдын алуға бағытталған мемлекеттік бастамаларды қолдауы аса маңызды. Тек бірлескен жауапкершілік арқылы ғана біз дені сау, қауіпсіз әрі жарқын болашақты қалыптастыра аламыз.
