Абай облысында полицейлер жүргізушілерді көліктерін қысқы маусымға алдын ала дайындауға шақырады, - деп хабарлайды Polisia.kz.
Температураның төмендеуіне және қыс мезгілінің жақындауына байланысты Абай облысы полиция департаменті автокөлік жүргізушілеріне көліктерін маусымдық дайындаудан уақтылы өткізу қажеттігін еске салады.
- Кеден одағының "Дөңгелекті көлік құралдарының қауіпсіздігі туралы (ТР ТС 018/2011) техникалық регламентінің 8-қосымшасының 5-бөліміндегі 5.5-тармағына сәйкес, қысқы кезеңде — желтоқсан, қаңтар және ақпан айларында — көлік құралдары қысқы шиналармен жабдықталуы тиіс. Сонымен қатар Кеден одағына мүше мемлекеттердің өңірлік органдары климаттық жағдайларды ескере отырып, қысқы шиналарға көшу мерзімін ертерек белгілей алады, — дейді Абай облысы полиция департаменті.
Полиция қызметкерлерінің айтуынша, Қазақстанның көптеген өңірлерінде салқын ауа райы күнтізбелік қыстан ертерек басталады, сондықтан шиналарды ауыстыруды ауа температурасы тұрақты төмендеген кезде жүргізу ұсынылады.
- Маңыздысы — теріс температура кезінде жазғы шиналардың пайдалану қасиеттері күрт төмендейді. Бұл көлікті басқаруға және тежеу жолының ұзындығына тікелей әсер етеді. Шиналарды алдын ала ауыстыру — бұл формальдылық емес, жол қозғалысына қатысушылардың барлығының қауіпсіздігі мәселесі, — деп атап өтті ведомство өкілдері.
Сондай-ақ полицейлер көліктің техникалық жағдайын, аккумулятордың, жылыту жүйесінің және әйнек тазалағыштардың дұрыстығын тексеруді, сондай-ақ қажетті қысқы жабдықтарды алдын ала дайындауды ұсынады.
- Жүргізушілерге шиналарды маусымдық ауыстыруды кейінге қалдырмай, көліктерін қысқы пайдалануға алдын ала дайындауды қатаң түрде ұсынамыз, — деп қорытындылады Абай облысы полиция департаменті.
