Абай облысы полиция департаменті бастығының орынбасары ПИК және МИБ өкілдерімен кездесті, - деп хабарлайды Polisia.kz.
Абай облысы полиция департаменті бастамасымен өңірдегі құқықтық тәртіп пен қоғамдық қауіпсіздікті нығайтуға бағытталған мазмұнды кездесу өтті. Жиынды департамент бастығының орынбасары Ернар Базаров жүргізіп, оған өңірдің ПИК және МИБ өкілдері қатысты.
Өз сөзінде Ернар Базаров: "Қоғамдық қауіпсіздік – тек полицияның ғана емес, барша қоғамның ортақ міндеті. ПИК және МИБ өкілдері тұрғындармен күнделікті байланыста болып, мәселелерді бірінші болып байқайды. Сондықтан біздің бірлескен жұмысымыз – құқық бұзушылықтың алдын алудағы ең тиімді құрал. Әр аулада тәртіп пен жауапкершілік қалыптасса, өңіріміздің қауіпсіздігі де нығая түседі", – деп атап өтті.
Кездесу ашық пікір алмасу форматында ұйымдастырылып, құқық бұзушылықтардың алдын алу, тұрғын үйлердің аулалары мен іргелес аумақтардағы қауіпсіздікті арттыру мәселелері жан-жақты талқыланды.
Полиция қызметкерлері қатысушыларға "Құқық бұзушылықтардың алдын алу туралы" заңның нормаларын түсіндіріп, оның іс жүзінде қалай жүзеге асырылатынына нақты мысалдар келтірді.
Жиын барысында "қауіпсіз аула – қауіпсіз қоғам" қағидаты негізгі ұстаным ретінде айқындалды. Себебі кез келген құқық бұзушылықтың алдын алу ең алдымен тұрғындардың белсенділігі мен жауапкершілігіне байланысты. Учаскелік инспекторлармен тығыз байланыс орнату, күмәнді жағдайлар туралы полицияға дер кезінде хабарлау, тұрмыстық жанжалдардың алдын алу – қоғамдық тыныштықтың кепілі екені атап өтілді.
Полиция өкілдері аулалардағы жарықтандыруды жақсарту, бейнебақылау камераларын орнату, домофон жүйелерін жаңарту және тұрғындар арасында құқықтық сауаттылықты арттыру бағытындағы бірлескен жұмыстардың маңыздылығын ерекше атап өтті.
Сонымен қатар тұрмыстық қылмыстың алдын алу, жастар арасындағы құқық бұзушылықтарды болдырмау және көршілер арасындағы өзара жауапкершілікті күшейту мәселелері де қозғалды.
ПИК және МИБ өкілдеріне олардың құқықтық тәртіпті сақтаудағы стратегиялық рөлі түсіндірілді. Олар – тұрғындармен күнделікті байланыста болатын, мәселелерді бірінші болып байқап, жедел әрекет ете алатын маңызды буын.
Осы ретте полиция мен басқарушы ұйымдардың серіктестігі қауіпсіз әрі жайлы өмір сүру ортасын қалыптастырудың басты тетігі екені айтылды.
Кездесу қорытындысында қатысушылар бірлескен іс-қимылды жүйелі түрде жалғастыруға келісті. Мұндай алаңдар тек ресми жиын ғана емес, сенім мен серіктестікті нығайтатын тиімді диалог алаңы болып табылады. Қоғамдық қауіпсіздік – ортақ жауапкершілік. Ал бірлік пен өзара қолдау бар жерде тәртіп пен тұрақтылық та берік болмақ.
