Абай облысында ҚАЖ жүйесінде қызметін жалғастырған Ауған соғысының ардагерлеріне құрмет көрсетілді, - деп хабарлайды Polisia.kz.
Абай облысында қылмыстық-атқару жүйесінің қызметкерлері ҚАЖ жүйесінде қызметін жалғастырған Ауған соғысының ардагерлерімен кездесу ұйымдастырды. Іс-шара Ауғанстаннан әскерлердің шығарылған күніне орай ұйымдастырылған еске алу шаралары аясында өтті.
Кездесуге 1985-1987 жылдары Бағлан қаласында жауынгерлік іс-қимылдарға қатысып, БМП-2 машинасының нысанашысы болған Айтмұхамбет Жакупов және Қандағар қаласында артиллерист ретінде қызмет атқарған Ержан Қалмақбаев қатысты.
Отанға оралғаннан кейін екі ардагер де Қазақстан Республикасы Ішкі істер министрлігінің қылмыстық-атқару жүйесінде шамамен 20 жыл қызмет етті. Бүгінде Ержан Қалмақбаев мекеменің медициналық бөлімінде еңбек етіп, адамдарға көмек көрсетуді жалғастыруда, ал Айтмұхамбет Жақыпов кәсіпкерлікпен айналысады.
Іс-шара барысында қатысушылар қаза тапқан жауынгерлерді бір минут үнсіздікпен еске алды. Ардагерлер әскери қызметтегі естеліктерімен бөлісіп, жауынгерлік достықтың, өзара қолдаудың және антқа адалдықтың маңызы туралы әңгімеледі.
- Біз ерлік іздеген жоқпыз — тек өз борышымызды адал орындап, ең қиын сәттерде бір-бірімізге тірек болуға тырыстық. Отаннан жырақта жүргенде достықтың, қолдаудың және “ар-намыс” сөзінің қадірін ерекше сезінесің. Ең бастысы — оралмаған азаматтардың рухын ұмытпай, олардың ерлігін жас ұрпаққа жеткізу, — деді Айтмұхамбет Жакупов.
Мекеме бастығының міндетін атқарушы Айдын Калелов мұндай кездесулердің жастарды патриоттық рухта тәрбиелеу мен корпоративтік құндылықтарды нығайтудағы маңызын атап өтті.
- Жауынгер-интернационалистер — ауыр сынақтан өткен буын. Олардың ерлігі сөзбен емес, нақты жауынгерлік тапсырмаларды орындаумен дәлелденген. Бүгінде олар қоғамға қызмет етуді жалғастырып, төзімділік пен тәртіптің, борышқа адалдықтың үлгісін көрсетіп келеді, — деді ол.
Кездесу соңында ардагер Ержан Қалмақбаев та өз ойымен бөлісті.
- Соғыста өмірдің қадірін, жаныңдағы әр адамды қорғаудың маңызын терең түсінесің. Біз өз борышымызды абыроймен атқардық. Қызмет оңай болған жоқ: күндіз ауа температурасы 50–60 градусқа дейін жетсе, түнде салқын болатын. Мен жастарымыздың Отанға деген сүйіспеншілік пен достыққа адалдық қағидаттарымен өскенін қалаймын, — деді ол.
Осындай кездесулер тарихи жадыны сақтауға және патриоттық құндылықтарды нығайтуға ықпал етеді. Олар жас ұрпаққа Отанға қызмет ету — тек мамандық емес, саналы өмірлік таңдау екенін еске салады.
