Абай облысының ең төменгі қауіпсіздік деңгейіндегі мекеме қызметкерлері "IZDEU – 2025" халықаралық іздеу қозғалыстары форумына қатысты, – деп хабарлайды Polisia.kz.
Абай облысының ең төменгі қауіпсіздік мекемесінің қызметкерлері Республика күні мен Ұлы Отан соғысындағы Жеңістің 80 жылдығына арналған "IZDEU – 2025" халықаралық іздеу қозғалыстары форумына қатысты.
Форумға Қазақстан, Ресей және Беларусь елдерінің өкілдері, дипломатиялық корпус мүшелері, іздеу ұйымдарының қатысушылары, ардагерлер, мемлекеттік қызметшілер мен белсенді жастар жиналды. Қатысушыларды біріктірген басты мақсат — тарихи жадты сақтау, ерлікпен қаза тапқандарға тағзым ету және осы құндылықтарды болашақ ұрпаққа жеткізу.
Іс-шара барысында ҚАЖД қызметкерлері ведомствоның патриоттық бағыттағы жобаларды жүзеге асыру тәжірибесін, іздеу экспедицияларына қатысуын, сондай-ақ қылмыстық-атқару жүйесі мекемелерінің жеке құрамына азаматтық-патриоттық тәрбие беру жөніндегі жұмысын таныстырды.
Форум бағдарламасына тақырыптық пікірталастар, көрмелер, ардагерлермен кездесулер, сондай-ақ іздеу барысында табылған жәдігерлер мен мұрағаттық материалдардың таныстырылымы кірді. Ерекше назар соғыс жылдарында қаза тапқан және хабарсыз кеткендерді еске алу ісіндегі халықаралық ынтымақтастық мәселелеріне аударылды.
— Мұндай іс-шараларға қатысу халықаралық байланысты нығайтып қана қоймай, тарихи шындықты сақтау мен жеке құрам арасында патриотизм мен азаматтық жауапкершілікті тәрбиелеуге ықпал етеді. Біз ата-бабаларымыздың ерлігіне құрмет пен естелік ісіне өз үлесімізді қосып жүргенімізді мақтан тұтамыз, — деді "Ерлік-Даңқ" іздеу-зерттеу жасағының командирі Арман Мұқанов.
— Біздің мақсатымыз — мекеме қызметкерлері өздерінің кәсіби міндеттерін адал орындап қана қоймай, сонымен бірге елдің тарихи мұрасының маңыздылығын терең сезінуі. Мұндай форумдар шабыт береді, біріктіреді және жастарға Отанға деген мақтаныш сезімі мен ата-баба ерлігіне құрмет көрсету қажеттігін еске салады, — деп атап өтті мекеме бастығының орынбасары Рүстем Берлібеков.
