Абай облысында жалған мемлекеттік тіркеу нөмірлері бар жүргізуші ұсталды, - деп хабарлайды Polisia.kz.
Абай облысының полиция қызметкерлері жүргізген жедел іс-шаралар нәтижесінде облыс орталығының 42 жастағы тұрғыны ұсталды. Белгілі болғандай, ол жол қозғалысы ережелерін 28 рет бұзып, 800 мың теңгеден астам айыппұл арқалаған.
Аталған азаматқа қатысты Қазақстан Республикасының Әкімшілік құқық бұзушылық туралы кодексінің 590-бабының 4-бөлігі бойынша әкімшілік құқық бұзушылық туралы хаттама толтырылды. Бұл бап көлік құралын әдейі жалған немесе қолдан жасалған мемлекеттік тіркеу нөмірлік белгілерімен басқарғаны, сондай-ақ нөмірлерді анықтауға кедергі келтіретін немесе өзгертуге арналған құрылғылар мен материалдарды қолданғаны үшін жауапкершілікті қарастырады.
Құқық бұзушыға 5 тәулікке дейін әкімшілік қамауға алу және көлік құралын басқару құқығынан 1 жылға айыру жазасы тағайындалуы мүмкін. Оның көлігі арнайы тұраққа қойылды.
Абай облысы полиция департаменті азаматтарды заң талаптарын сақтауға және жол қозғалысы ережелерін қатаң ұстануға шақырады.
