Абай облысында ақсақалдар мен әкімдер полициямен бірлесіп, ауылдағы тәртіпті нығайтуда, — деп хабарлайды Polisia.kz.
Абай облысында “Зиялы қауым” атты бірегей бағдарлама жүзеге асырылуда. Бағдарламаның негізгі мақсаты — ауылдық әкімдіктердің, беделді ақсақалдардың, шаруа қожалықтары басшыларының және учаскелік полиция инспекторларының күшін біріктіре отырып, құқықтық тәртіпті нығайту және ауылдық жерде қауіпсіз ортаны қалыптастыру.
Бағдарлама “Тәртіп — бәрімізге ортақ іс” қағидасына негізделген. Жергілікті қауым өкілдері полиция жұмысына белсенді түрде тартылуда — олар проблемалық аумақтарды тексеру бойынша өз ұсыныстарын білдіреді, құқық бұзушылықтардың алдын алуға қатысады, әлеуметтік бейімсіз адамдармен жұмысқа көмектеседі, бірлескен патрульдеуге қатысады және маңыздысы, салауатты өмір салтын, оның ішінде ішімдіктен бас тартуды насихаттайды.
Жарқын мысал — Бесқарағай ауданының Бірлік ауылы. Мұнда ақсақалдардың қолдауы мен учаскелік инспекторлармен тығыз өзара іс-қимылдың нәтижесінде ауыл тұрғындары ішімдіктен бас тарту жөнінде ортақ шешім қабылдады. Бұл – елеулі серпіліс болды. Қазірдің өзінде оның нәтижесі байқалуда: ауылда тұрмыстық жанжалдар, құқық бұзушылықтар мен полиция шақыртулары едәуір азайған.
— Тұрғындар полицияның серіктесіне айналған кезде бұл біздің жұмысымызды жеңілдетіп қана қоймай, бүкіл жағдайды түбегейлі өзгертеді. Адамдар өз ауылы үшін жауапкершілікті сезініп, оның болашағына ықпал ете бастайды, — деп атап өтті полиция учаскелік инспекторы Серіков Айдын.
“Зиялы қауым” бағдарламасы – бұл бір реттік акция емес, ұзақ мерзімді оң өзгерістерге бағытталған жүйелі тәсіл. Бағдарлама аясында ұрпақтар арасындағы жоғалған байланыс қалпына келтірілуде, құқық қорғау органдарына деген сенім артып, дәстүрлі құндылықтарға деген құрмет қайта оралуда.
Тек біріккенде ғана біз салдармен күреспей, түйткілді мәселелердің алдын алуға мүмкіндік аламыз. Және, бәлкім, дәл осындай шағын, бірақ маңызды қадамдар жаңа өмір сапасына бастар жолдың бастауы болар.
