Абай облысының полициясы өткен жылдың жұмысын қорытындылады, – деп хабарлайды Polisia.kz.
13 қаңтар күні облыстық полиция департаментінде 2024 жылдың жұмыс қорытындыларына арналған кеңейтілген жиын өтті. Оған облыстық полиция департаментінің бастығы Бектөре Сұлтан және ҚР ІІМ Әкімшілік полиция комитетінің төрағасы Қайсар Сұлтанбаев қатысты.
Жиында Бектөре Сұлтан қызметтік-оперативтік жұмыстың егжей-тегжейлі есебін ұсынып, қол жеткізілген негізгі жетістіктерді атап өтті. Ол алдағы жылға қойылған басымдықтарды да айқындап, «Заң мен Тәртіп» қағидасын жүзеге асыруды жалғастыру, қоғаммен тығыз өзара іс-қимылды нығайту және профилактикалық шараларды күшейту қажеттігін ерекше назарға алды.
Кәмелетке толмағандарды қорғау мәселесі жиынның басты тақырыптарының бірі болды. Қайсар Сұлтанбаев бұл бағыттағы жұмыстың маңыздылығын ерекше атап өтті.
– Балаларға қатысты зорлық-зомбылыққа жол бермеу – біздің негізгі принциптеріміздің бірі. Біз отбасылармен, білім беру мекемелерімен және басқа да құрылымдармен белсенді жұмыс істеуіміз керек. Өскелең ұрпақ үшін кез келген қауіптің алдын алу – біздің басты міндетіміз, – деді ол.
Жиын барысында 2025 жылдың ресми түрде профилактика жылы деп жарияланғаны хабарланды. Бұл жыл құқық бұзушылықтардың алдын алу, заңға бағыну мәдениетін қалыптастыру және азаматтар мен құқық қорғау органдары арасындағы сенімді нығайтуға бағытталған маңызды қадам болмақ.
Жиын қорытындысында полиция департаментінің оң нәтижелері жоғары бағаланды. Алдағы уақытта құқықтық тәртіпті қамтамасыз етудегі профилактикалық тәсілді одан әрі жетілдіру және өңір тұрғындарының қауіпсіздігін нығайту міндеттері белгіленді. Азаматтардың сенімі мен өңірдің тыныштығы – басты басымдық болып қала береді.
