Жазғы демалыс маусымының басталуына орай Абай облысында полицейлер Алакөл көлінің жағалауында қоғамдық тәртіп пен демалушылардың қауіпсіздігін қамтамасыз етуге кірісті, - деп хабарлайды Polisia.kz.
Көл жағалауы Мақаншы ауданына қарасты Қабанбай ауылы маңында орналасқан.
Жағалаудағы полиция тірек пункті базасында биылғы жылдың алғашқы саптық нұсқаулық жиыны өткізілді.
Жеке құрамға қоғамдық тәртіпті сақтау, жол-көлік оқиғаларының алдын алу, су айдындарындағы қауіпсіздікті бақылау және төтенше жағдайларға жедел ден қою міндеттері жүктелді.
Сонымен қатар полицейлер бұзақылық, қоғамдық орындарда алкогольдік ішімдіктер ішу сияқты құқық бұзушылықтардың алдын алу бойынша түсіндіру жұмыстарын жүргізіп, кәмелетке толмағандардың қауіпсіздігін қамтамасыз ететін болады. Демалушылар көп жиналатын аумақта қоғамдық тәртіптің сақталуына баса назар аударылады.
Қауіпсіздік шаралары бүкіл шомылу маусымы бойы жалғасады. Абай облысының полиция департаменті азаматтарды қоғамдық тәртіпті сақтауға, сергек болуға және қоршаған ортаға ұқыпты қарауға шақырады.
Қосымша тәртіпті қамтамасыз ету үшін облыс орталығынан 50-ден астам қызметкер жұмылдырылды.
