Алматы бойынша ҚАЖД қызметкерлері Конституция күнін атап өтті, - деп хабарлайды Polisia.kz.
Қазақстан Республикасы Конституциясының 30 жылдығын Алматы қаласы бойынша Қылмыстық-атқару жүйесі департаментінің жеке құрамы салтанатты түрде атап өтті.
Салтанатты жиында жеке құрамды құттықтаған департамент бастығы Е.Ұзақов Конституцияның халықтың бірлігін, қоғамдық және рухани келісімін нығайтып, егемендік пен саяси тұрақтылықтың кепіліне айналған басты құжат екенін атап өтті.
Сонымен қатар Ардагерлер кеңесінің төрағасы Е.Сағалбаев та сөз сөйлеп, қоғамдық тәртіпті сақтауда, қылмысқа қарсы күресте біліктілік танытып, азаматтардың конституциялық құқықтары мен бостандықтарын қорғауда ардагерлердің де үлесі мол екенін тілге тиек етті.
Ата заңымыздың құрметіне арналған іс- шарада қызметтік міндеттерін үлгілі атқарған және жеке құрам мен сотталғандар арасында жүйелі жұмыс жүргізген қызметкерлер "Қылмыстық-атқару жүйесін дамытуға қосқан үлесі үшін" медаліне, "Қылмыстық-атқару жүйесінің үздігі" төсбелгісіне және Ішкі істер министрлігінің грамоталарына ие болса, бірқатар қызметкерлер "Қазақстан патриоты" медалімен марапатталды.
Жиын барысында жеке құрам өздерімен бір сапта еңбек еткен бірнеше әріптестерін зейнеткерлікке салтанатпен шығарып салды.
Конституция күніне арналған салтанатта қызметке тағайындалған жас қызметкерлер Қазақстан Республикасының Конституциясы мен заңнамаларын қатаң сақтауға, өз лауазымдық қызметтерін адал атқаруға салтанатты түрде ант берді.
