Алматыда полиция қызметкерлері колледж басшылығымен жасөспірімдер арасындағы құқық бұзушылықтың алдын алу мәселелерін талқылады, – деп хабарлайды Polisia.kz.
Алматыда полиция қызметкерлері қала колледждері директорларының орынбасарларымен жұмыс кеңесін өткізіп, жасөспірімдер қылмысының алдын алу және білім алушы жастар арасында құқық бұзушылықтардың жолын кесу мәселелерін қарастырды.
Іс-шараға Алматы қаласындағы 90-ға жуық колледждің өкілдері қатысты. Бұл жүргізіліп жатқан профилактикалық жұмыстың ауқымды әрі жүйелі сипатқа ие екенін көрсетеді.
Кеңес барысында кәмелетке толмағандар арасында құқық бұзушылықтар мен қылмыстардың алдын алу, тәуекел тобына жататын жасөспірімдерді ерте анықтау, заңға қайшы әрекеттер үшін жауапкершілік, білім беру ұйымдары мен полиция арасындағы өзара іс-қимылды күшейту, сондай-ақ жастар арасында "Заң мен тәртіп" қағидатын қалыптастыру мәселелері талқыланды.
Сонымен қатар колледждердің педагогикалық құрамы мен әкімшілігінің девиантты мінез-құлықтың алдын алудағы рөліне және жасөспірімдер ортасындағы алаңдататын белгілерге уақытылы ден қоюдың маңызына ерекше назар аударылды.
— Жасөспірімдер қылмысының алдын алу — полиция мен білім беру жүйесінің күнделікті бірлескен жұмысы. Тек тұрақты өзара іс-қимыл арқылы ғана біз жастарды бүкіл болашағына әсер етуі мүмкін қателіктерден қорғай аламыз. "Заң мен тәртіп" қағидаты ең алдымен жауапкершілікті түсіну мен заңға құрметтен басталады, — деді Алматы қаласы полиция департаментінің ұйымдасқан қылмысқа қарсы күрес басқармасының бастығы Жанат Нұрғалиев.
Кеңес қорытындысы бойынша тараптар бірлескен профилактикалық жұмысты күшейтуге, білім алушылармен түсіндіру кездесулерін жалғастыруға және тұрақты ақпарат алмасуды қамтамасыз етуге келісті.
