Алматы облысы ПД бастығы азаматтарды қабылдады, - деп хабарлайды Polisia.kz.
Алматы облысы полиция департаментінде "Ашық және халық үніне құлақ асатын мемлекет" тұжырымдамасын іске асыру аясында азаматтардың кезекті апта сайынғы қабылдауы өткізілді. Қабылдау барысында тұрғындар көтерген әлеуметтік-тұрмыстық сипаттағы өзекті мәселелер қаралып, жекелеген өтініштер бойынша нақты тапсырмалар берілді.
–Азаматтарды қабылдау – тұрақты негізде өтіп тұратын маңызды іс-шара. Мұндай қабылдауларменің тікелей бақылауымда, сондықтан әрбір өтінішке жіті мән беріліп, шешу жолдары қарастырылады, – деп атап өтті облыстық полиция департаментінің бастығы Мейрам Әбікеев.
Сонымен қатар аудандық бөлімше басшыларына да халықпен жүйелі түрде кездесулер өткізу, проблемалық мәселелерді шешу жолдары мен мерзімдерін түсіндіру, тұрғындарды атқарылып жатқан жұмыстардан хабардар ету міндеті жүктеліп отыр.
– Азаматтармен тікелей қарым-қатынас – жұмысымыздың ажырамас бөлігі. Мұндай кездесулер нақты мәселелерді шешуге ғана емес, құқық қорғау органдарына деген сенімді нығайтуға да ықпал етеді. Біз "Халық үнінеқұлақ асатын мемлекет" тұжырымдамасын ұстана отырып, жұмысымызды барынша ашық және айқын етуге тырысамыз, – деп толықтырды М. Әбікеев.
Полиция жұмысының негізгі қағидаттары – ашықтық, айқындық және қоғаммен диалог орнату. Бұл бағыттар Алматы облысында қоғамдық тәртіп пен қауіпсіздікті нығайтуға бағытталған.
