Алматы облысы ПД қызметкерлері ІІМ ардагерін 90 жылдық мерейтойымен құттықтады, – деп хабарлайды Polisia.kz.
2025 жылдың 12 қаңтарында ішкі істер органдарының көрнекті ардагері Жүнісбеков Шолпанбай Әшірбекұлына 90 жыл толды. Мерейтой қарсаңында Алматы облысы полиция департаментінің қызметкерлері ардагердің үйіне барып, оған құрмет пен алғыстарын білдірді.
Сапар барысында полиция өкілдері мерейтой иесіне дәстүрлі қазақ шапанын жауып, Қазақстан Республикасы Ішкі істер министрінің атынан алғыс хат табыстады.
Жүнісбеков Шолпанбай Әшірбекұлы 1935 жылы 12 қаңтарда Алматы облысы Жамбыл ауданы Қарғалы ауылында дүниеге келген. Оның өмірі мен қызметі жоғары кәсібилік пен қызметке адалдықтың жарқын үлгісіне айналды.
1968 жылдан бастап Шолпанбай ата ҚР ІІМ материалдық-техникалық қамтамасыз ету басқармасы бастығының орынбасары қызметін атқарды, ал 1972 жылы осы басқарманы басқарды. Оның ұйымдастырушылық қабілеті арқасында ішкі істер органдарының бөлімшелерін материалдық-техникалық ресурстармен қамтамасыз ету бойынша күрделі міндеттер шешілді.
1982 жылдан 1995 жылға дейін ол Алматы облыстық ІІБ бастығының орынбасары болып қызмет атқарды. Осы жылдары қызметкерлерді жұмылдыру, өндірістік жоспарларды орындау және полиция қызметкерлерінің тұрғын үй-тұрмыстық жағдайларын жақсарту мәселелеріне ерекше назар аударды.
Оның бастамасымен Алматы қаласында қызметкерлерге арналған көпқабатты үй салынды және ұжымдық бау-бақша үшін жер учаскесі бөлінді. Зейнетке шыққаннан кейін де ардагер ІІМ ардагерлеріне белсенді көмек көрсетуді жалғастырды. Ол саяжай учаскелерін ұйымдастырумен, ішкі істер органдарының бұрынғы қызметкерлеріне арналған үйлердің құрылысымен және тұрғын үй мәселелерін шешумен айналысты.
Өз қызметі барысында Шолпанбай Жүнісбеков бірнеше рет «Құрмет белгісі» орденімен, «КСРО ІІМ еңбегі сіңген қызметкері», «ҚР ІІМ құрметті ардагері» белгілерімен, 21 медальмен және төсбелгілермен марапатталды.
– Сіздің өміріңіз – ерлік, еңбек және мамандыққа адалдықтың айқын көрінісі. Біз сіздің жетістіктеріңізбен әрдайым мақтанамыз және сіздің үлгі-өнегеңізді ұстануға тырысамыз, – деп полиция өкілдері сыйлықтарды табыстау кезінде атап өтті.
