Алматы облысында полиция алаяқтық пен киберқылмысқа қарсы күресті күшейтті, - деп хабарлайды Polisia.kz.
Алматы облысында қоғамдық қауіпсіздікті қамтамасыз ету, алаяқтықтың алдын алу және заңдылықты нығайту бағытында жүйелі шаралар атқарылуда. Жыл басынан бері азаматтарды қылмыстық қол сұғушылықтан қорғауға арналған 53 профилактикалық іс-шара өткізіліп, олардың аясында түрлі акциялар, рейдтер және тұрғындармен кездесулер ұйымдастырылды.
Ақпан және мамыр айларында өткен "Anti-fraud" республикалық жедел-профилактикалық іс-шарасы барысында полицейлер 17 қылмысты "ізін суытпай" ашып, бұрын жасалған 43 қылмыстық істің бетін ашты. Оның ішінде өткен жылдарда жасалған үш қылмыс та бар.
12–30 маусым аралығында "Алаяқтыққа жол жоқ" атты кең ауқымды акция өтті. Бұл шараға облыстың 471 мыңнан астам тұрғыны қамтылып, бұл өңір халқының шамамен 30 пайызын құрады. Сонымен қатар мессенджер топтары мен әлеуметтік желілер арқылы 1,7 миллионнан астам адамға алаяқтықтан сақтану жөнінде ақпарат жеткізілді. 368 ауылда тұрғындармен кездесулер өткізіліп, мектептерде, колледждерде, мемлекеттік мекемелер мен мешіттерде түсіндіру жұмыстары жүргізілді. Қоғамдық орындарға алаяқтықтың алдын алуға арналған билбордтар мен LED-экрандар орнатылды.
25 маусым – Қаржылық қауіпсіздік күні қарсаңында "XXI ғасыр триггерлері" атты форум ұйымдастырылды. Оған 500-ден астам бюджеттік мекеме қызметкерлері қатысып, интернет-алаяқтықтың кең тараған түрлері, дипфейктер және қаржылық деректерді қорғаудың қарапайым әдістері туралы дәрістер тыңдады. Форумда полиция қызметкерлері ақпараттық бейнероликтер көрсетіп, тұрғындарды заманауи қауіптерден сақтандырудың жолдарын түсіндірді.
Жаңа алаяқтық әдістерінің алдын алуға да ерекше көңіл бөлінді. "Қазпошта" мен коммуналдық қызмет өкілдерінің атын жамылған алаяқтарға қарсы арнайы бейнероликтер әзірленді. Онда шынайы қызметкерлердің азаматтардан жеке деректер мен SMS-кодтар талап етуге құқығы жоқ екені ескертілді.
Киберқылмысқа қарсы іс-қимыл өңір полициясы жұмысының басым бағыттарының бірі болып отыр. Жүргізілген жедел шаралардың нәтижесінде бес ірі "дропперлер" тобы әшкереленіп, 14 күдікті ұсталды. Тергеу барысында 200-ден астам қылмыстық эпизод анықталып, жәбірленушілерге келтірілген залал көлемі 975 миллион теңгеден асқаны белгілі болды.
