"Уылдырық" жедел алдын алу іс-шарасы аясында Алматы облысы Балқаш ауданында полиция қызметкерлері су биоресурстарын заңсыз аулаудың екі фактісін анықтады, – деп хабарлайды Polisia.kz.
Бірінші жағдай Топар-Бақанас автожолының 12-шақырымында тіркелді. Полиция қызметкерлері Subaru автокөлігін тексеру үшін тоқтатты. Оны Топар ауылының 57 жастағы тұрғыны басқарған.
Тексеру барысында тәртіп сақшылары жүксалғыштан жалпы салмағы 77 келі болатын әртүрлі балық түрлері салынған екі қапты анықтады. Алдын ала есептеулер бойынша келтірілген шығын 580 мың теңгені құрады. Балық электр тоғының көмегімен заңсыз ауланғаны белгілі болды, бұл әдіс су экожүйесіне елеулі зиян келтіреді.
Екінші оқиға Бақанас ауылының шетінде анықталды. УАЗ көлігін тінту барысында полиция қызметкерлері жалпы салмағы 36 келі болатын заңсыз ауланған балық салынған бір қапты тапты. Көлік ішінде 33 жастағы жүргізуші мен оның жолаушысы болған. Олардың заңсыз әрекеттерінен келтірілген шығын 280 мың теңгеге бағаланды.
Тексеру кезінде браконьерлердің Қытайда өндірілетін, тыйым салынған ау құралдарын пайдаланғаны анықталды.
Аталған екі факті бойынша балық ресурстарын заңсыз аулау бабымен қылмыстық істер қозғалды. Қазіргі уақытта сотқа дейінгі тергеу амалдары жүргізілуде, құқық бұзушылықтардың барлық мән-жайы анықталып жатыр.
Құқық қорғау органдары заңсыз балық аулау, әсіресе уылдырық шашу кезеңінде, су биологиялық ресурстары қорғауды қажет ететін уақытта аса қауіпті екенін еске салады. Полиция азаматтарды экологиялық заңнаманы қатаң сақтауға және браконьерліктен бас тартуға шақырып, мұндай заң бұзушылықтар үшін қатаң жауапкершілік қарастырылғанын ескертеді.
