Алматы облысында сотталғандар танымал спортшылармен кездесті, – деп хабарлайды Polisia.kz.
Алматы облысының қылмыстық-атқару жүйесі мекемелерінде танымал спортшылардың қатысуымен нашақорлықтың алдын алуға бағытталған акция өтті.
Әлем чемпионы, каратэ шебері Закир Тохтиев №12 мекемесіне, ал жеңіл атлетикадан Олимпиада чемпионы Ольга Шишигина №57 мекемесіне барып, сотталғандармен кездесті. Іс-шара салауатты өмір салтын насихаттау және нашақорлықтың алдын алу мақсатында ұйымдастырылды.
Спортшылар өздерінің өмір жолы, спорт пен тәртіптің маңыздылығы туралы әңгімелеп, есірткінің адам денсаулығы мен болашағына тигізетін зиянды әсерін атап өтті. Олар сотталғандарды үмітін үзбеуге, өзін-өзі дамытуға және дұрыс жолды таңдауға шақырды.
Акцияға сондай-ақ ҚАЖ департаменті мен есірткі қылмысына қарсы күрес басқармасының өкілдері қатысты. Олар мұндай кездесулер нашақорлық мәселесіне деген саналы көзқарасты қалыптастыруға ықпал ететінін атап өтті.
Осындай іс-шаралар сотталғандарға маңызды ақпарат жеткізіп қана қоймай, оларды өзгеруге ынталандырады. Бұл – спорт пен жігерлі рухтың кез келген қиындықты жеңуге көмектесетінін дәлелдейді.
– Біздің мақсатымыз – тек жазаны орындау ғана емес, сонымен қатар сотталғандарды түзеу, оларға дұрыс өмірлік құндылықтарды сіңіру. Белгілі спортшылармен кездесулер олардың ой-санасын өзгертіп, есірткіден бас тартып, болашағын қайта қарастыруына септігін тигізеді. Спорт – бұл күш, тәртіп және ертеңгі күнге деген сенім. Демек, жаңа өмір бастауға берілген мүмкіндік, – деп атап өтті ҚАЖ департаменті бастығының орынбасары Магнис Сабиров.
