Алматы полиция департаментінің қабырғасында кезекті ерлік сабағы өтті. Бұл жолы ондаған бейбіт тұрғындардың өмірін сақтап қалу үшін құрбан болған халық қаһарманы Ғазиз Байтасовты еске алуға арналды, – деп хабарлайды Polisia.kz.
Іс-шараға «Капитан Байтасов» кітабының авторы журналист Тоқнияз Кучуков қатысты. Ол қызметкерлерге кітап жазу идеясы мен осы жобаның ерекшеліктері туралы айтып берді.
– Басты мақсат – азаматтарды қорғау, қылмыспен күресу жүктелген жас полицейлерді отансүйгіштікке және рухани құндылықтарға тәрбиелеу, – деді Алматы қалалық ПД тәрбие және кадр саясаты басқармасының бастығы Нариман Батаев.
Ғазиз Байтасов 1971 жылы 3 сәуірде Қазақ КСР Жамбыл облысы Түймекент ауылында дүниеге келген.
Қаһарман полицей Жамбыл облысы ішкі істер департаменті жол полициясы жеке батальонының 1 взводының командирі болды.
Ол 2011 жылы 12 қарашада Тараз қаласында болған лаңкестік әрекет нәтижесінде ерлікпен қаза тапты.
Оған қайтыс болғаннан кейін 2011 жылы 5 желтоқсанда «Халық Қаһарманы» атағы берілді.
