Алматыда "Мен – тергеушімін" атты публицистикалық еңбектің тұсаукесері өтті, - деп хабарлайды Polisia.kz.
Бүгін Қазақстан Республикасы ішкі істер органдары тергеушілерінің кәсіби мерекесіне орай Алматы қаласында "Мен – тергеушімін" атты публицистикалық еңбектің тұсаукесері өтті.
Кітап авторы – отставкадағы полиция полковнигі, бүкіл саналы ғұмырын тергеу саласына арнаған Бауыржан Рахимов. Ол ішкі істер министрлігінің тергеу бөлімдерінде ұзақ жылдар адал еңбек етіп, тергеушілік кәсіптің қыр-сырына терең бойлаған тәжірибелі маман.
"Мен – тергеушімін" кітабы – бір адамның еңбек жолының шежіресі ғана емес, сондай-ақ ІІМ тергеу аппараттарының қалыптасу кезеңдері мен даму тарихына арналған терең әрі шынайы зерттеу. Шығармада автордың жеке естеліктері, нақты оқиғаларға негізделген оқиғалар мен тергеу қызметінде еңбек еткен танымал тұлғалардың өмірбаяндары қамтылған. Бұл кітап оқырманға тергеуші мамандығына басқа қырынан көз тастап, осы кәсіптің күрделі де жауапты қырларын терең ұғынуға мүмкіндік береді.
– Тергеушінің жұмысы – жай ғана қылмысты ашу емес. Бұл – батылдықты, әділдікке деген адалдықты, елге шексіз қызмет етуді талап ететін жауапты міндет. Осы кітап арқылы оқырман шындықты анықтаудың қаншалықты күрделі екенін, әділеттің бағасы қандай болатынын түсінсе деймін. Бұл – заң жолында аянбай еңбек еткен әріптестеріме деген құрметім мен жеке үлесім, – деді тұсаукесер барысында автор Бауыржан Рахимов.
"Мен – тергеушімін" кітабы бүгінде ішкі істер органдары қызметкерлері, сала ардагерлері мен болашақ полицей мамандығын таңдаған жастар арасында үлкен қызығушылық тудырып отыр. Басылымның кәсіби дәстүрлерді насихаттап, жас мамандарға бағыт-бағдар берер тәрбиелік һәм танымдық құралға айналары сөзсіз.
