Алматыда оқушыларға жолдағы қауіпсіз мінез-құлық интерактивті форматта үйретілуде, - деп хабарлайды Polisia.kz.
Алматы қаласы Наурызбай ауданындағы №221 жалпы білім беретін мектеп базасында "Заң мен тәртіп – қауіпсіз балалық шақ кепілі" республикалық жобасы аясында қалалық практикалық семинар өтті.
Аталған бастама Қазақстан Республикасы Ішкі істер министрлігінің бастамасымен, 2026 жылды заңдылық пен өскелең ұрпақтың қауіпсіздігіне арнау шеңберінде жүзеге асырылуда. Жобаның негізгі мақсаты – кәмелетке толмағандар арасындағы құқық бұзушылықтардың алдын алу, олардың құқықтарын қорғау және жол қозғалысы кезінде қауіпсіз мінез-құлық дағдыларын қалыптастыру.
Семинар тәжірибелік бағытта ұйымдастырылды. Оқушылар жолды қауіпсіз кесіп өту, жол жағдайын дұрыс бағалау, жол белгілерін ажырату және модельденген қауіпті жағдайларда дұрыс әрекет ету дағдыларын пысықтады. Іс-шара барысында жеке жауапкершілік сезімін қалыптастыруға, сондай-ақ жолда ойланбай жасалған әрекеттердің салдарын түсіндіруге ерекше назар аударылды.
Шараға полиция қызметкерлерімен қатар прокуратура органдарының өкілдері, жол қозғалысы қауіпсіздігі саласының мамандары, педагогтер мен ата-аналар қатысты.
Алматы қаласы полиция департаменті бастығының орынбасары Әділғожа Құсайыновтың айтуынша, баланың қауіпсіздігі білім мен тәртіптен басталады.
- Біздің міндетіміз – ережелерді жай ғана еске салу емес, балалардың қауіпсіз мінез-құлық дағдыларын жүйелі түрде қалыптастыру. Егер бала жолдағы қауіп-қатерді ерте жастан дұрыс бағалауды үйренсе, оның өмірі мен денсаулығын сақтау мүмкіндігі артады. Жоба аясындағы жұмыс қаланың барлық білім беру ұйымдарында жалғасады, – деді ол.
Жоба жүйелі сипатқа ие. Алдағы уақытта ол Алматы қаласының мектептері мен мектепке дейінгі ұйымдарында тұрақты түрде жүзеге асырылатын болады.
