Алматыда полицейлер қызметтік борышын өтеу кезінде қаза тапқан әріптестерін еске алды, – деп хабарлайды Polisia.kz.
Алматы қаласы полиция департаментінде 2016 жылғы қайғылы оқиғаға орай қаза тапқан полиция қызметкерлеріне арналған еске алу шарасы өтті. Салтанатты рәсім барысында департамент басшылығы, жеке құрам, ішкі істер органдарының ардагерлері және қаза болғандардың туыстары полиция қызметкерлеріне арналған ескерткішке гүл шоқтарын қойды.
Еске сала кетейік, террористік әрекет салдарынан 9 адам қаза тауып, оның ішінде 7 полиция қызметкері қызметтік борышын атқару кезінде ерлікпен көз жұмды. Қатысушылар қаза тапқандарды бір минут үнсіздікпен еске алды.
- Бұл қайғылы күн Алматы полициясының тарихында мәңгілік қалды. Бүгін біз бейбіт тұрғындардың қауіпсіздігі үшін жанын қиған әріптестеріміздің ерлігі алдында басымызды иеміз. Олардың ерлігі – антқа шексіз берілгендіктің, қаһармандық пен жанқиярлықтың үлгісі. Біз оларды еске алып қана қоймай, жас ұрпаққа үлгі-өнеге көрсетуге міндеттіміз. Адал, табанды, Отанға қызмет етуге дайын мамандарды қалыптастыруымыз қажет, - деді Алматы қалалық полиция департаменті бастығының орынбасары Әділғожа Құсайынов.
Гүл қою рәсімі – өз өмірін құрбан етіп, азаматтардың қауіпсіздігін қорғаған қызметкерлерге деген терең құрмет пен алғыстың белгісі. Мұндай іс-шаралар полиция қызметкерлерін патриоттық рухта тәрбиелеуде және ұрпақтар сабақтастығын қалыптастыруда маңызды рөл атқарады.
