Алматыда полиция алаяқтар туралы постерлерді таратты, – деп хабарлайды Polisia.kz.
Алматыда интернет-алаяқтықты 10,5%-ға төмендетуге мүмкіндік туды.
Құқық қорғау органдары зияткерлік меншік құқықтарын бұзумен байланысты қылмыстардың алдын алу және оларға қарсы күресті күшейту бойынша жұмыс жүргізуде.
– Жедел жағдайды тұрақтандыру мақсатында полицейлер халықпен жұмысты негізгі критерийлер бойынша жүргізеді . Бұл ең алдымен, халықтың құқықтық сауаттылығы, яғни БАҚ деңгейінде қолжетімді және түсінікті ақпараттық жұмыс, буклеттер, брошюралар, көшелерде, қоғамдық орындарда, интернет-алаяқтықтың түрлері мен әдістері туралы ескертулер. Сондай-ақ алаяқтықтың жаңа түрлеріне, оларды жасау жолдарына және дер кезінде алдын алу шараларына мониторинг жүргізілуде, – дейді Медеу аудандық полиция басқармасының бастығы Ілияс Өмірсеріков.
Спикердің айтуынша, қаладағы сауда орталықтары мен супермаркеттерде интернет-алаяқтықтың алдын алу бойынша постерлер ілініп, қаланың орталық көшелеріндегі электронды билбордтарда интернет-алаяқтықтың әдістері мен түрлері туралы ескертпе бейнероликтер көрсетілуде.
– Құрметті Алматы қаласының тұрғындары мен қонақтары! Сіздерге тағы да жүгінгім келеді және сіздерден, ең алдымен, жеке деректеріңізге қатысты тәртіпті сақтауларыңызды сұраймын: жеке ақпаратты, телефон құпия сөздеріңізді немесе карталарыңыздың CVR кодтарын ешкіммен бөліспеңіз. Оларды алаяқтар пайдалануы мүмкін. Банктен түскен кез келген қоңырауды, туыстармен болған кез келген жағдайды қайта-қайта тексеру керек, – деді Ілияс Өмірсеріков.
Естеріңізге сала кетейік, бұл күндері Алматыда ақпараттық технологияларды қолдану арқылы жасалған құқық бұзушылықпен күресу шараларының тиімділігін арттыруға бағытталған «Anti Fraud» республикалық іс-шарасы өтуде.
