Алматыда полиция құқық бұзушылықтардың алдын алу бойынша ауқымды тексерісті бастады,– деп хабарлайды Polisia.kz.
Алматы қаласында 10–12 наурыз аралығында өтетін "Қауіпсіз курьер" және "Келімсек" жедел-профилактикалық іс-шараларына ресми түрде бастау берілді. Аталған шаралар аясында курьерлік қызметтің заңдылығын тексеру, көші-қон заңнамасының сақталуын бақылау және құқық бұзушылықтардың алдын алу бағытында кешенді жұмыстар күшейтілді.
Іс-шаралардың басталуы Алматы қаласы полиция департаментінің басшылығы қатысқан полицияның кешенді күштерінің бірыңғай саптық жиынымен ерекшеленді.
Алматы қаласы полиция департаментінің бастығы Айдын Кабдулдиновтың айтуынша, жүргізіліп жатқан шаралардың басты мақсаты — құқық бұзушылықтардың алдын алу және мегаполис тұрғындарының қауіпсіздігін қамтамасыз ету.
— Соңғы жылдары Алматыда курьерлік қызмет саласы қарқынды дамып келеді. Күн сайын мыңдаған қала тұрғыны тауарлар мен азық-түлік жеткізу қызметін пайдаланады. Біздің міндетіміз — осы қызметтің заң талаптарына сай жүзеге асырылуын қамтамасыз ету, курьерлік қызметтің заңдылығын, пайдаланылатын көлік құралдарын және қажетті құжаттардың болуын тексеру, — деді Айдын Кабдулдинов.
Сонымен қатар "Келімсек" жедел-профилактикалық іс-шарасы аясында полиция қызметкерлері көші-қон заңнамасының сақталуына да ерекше назар аударады.
— Қазақстан Республикасының аумағында заңсыз жүрген тұлғаларды анықтау, сондай-ақ заңсыз көші-қон арналарының жолын кесу бағытында нақты жұмыстар жүргізіледі. Бұл шаралардың барлығы, ең алдымен, профилактикалық сипатқа ие және азаматтардың қауіпсіздігін қамтамасыз етуге бағытталған, — деп атап өтті Айдын Кабдулдинов.
Полиция азаматтар мен жеткізу қызметінің өкілдерін заң талаптарын қатаң сақтауға шақырады. Қоғамдық қауіпсіздікті қамтамасыз ету — мемлекет пен қоғамның ортақ міндеті.
