Ұлттық мереке – Республика күнін Алматыдағы тергеу изоляторындағы шаруашылық жасағындағы сотталғандар да зор қуанышпен атап өтті, – деп хабарлайды Polisia.kz.
Салтанатты жиында Алматы қаласы бойынша ҚАЖД №72 мекемесі бастығының тәрбие жұмысы жөніндегі орынбасары Рауан Шаяхметов құттықтау сөзбен ашып, жеке құрам мен сотталғандарды еліміздің ең ұлық мерекесі – Республика күнімен құттықтады.
“Менің Отаным – Қазақстан” деген тақырыппен өткен салтанатты кеште шаруашылық жасағының сотталғандары шабытты жыр жолдарымен өрнектеді.
Жазалы жандар бұл кеште еліміздің ең құнды құжаты – Егемендік туралы декларацияның қабылдану тарихын бөлісіп, осындай тарихи оқиғалардың куәсі болған заманда өмірге келгендерін зор мақтанышпен жеткізді.
120 ұлттың өкілдері тұратын Қазақстанда қазақ халқының байырғы, төл мәдениетімен, салт-дәстүріне адалдығымен ерекшеленетінін атап өткен сотталғандар жарқын болашақтан өз орындарын табатындарына сенім білдірді.
Салтанатты кештің соңында сотталғандар Қ.Мырзалиевтің сөзіне жазылған Ескендір Хасанғалиевтың “Атамекен” әнін шырқады.
