Алматыда жол қауіпсіздігін арттыруға бағытталған кең ауқымды науқан өтті, - деп хабарлайды Polisia.kz.
23 наурызда еліміздің ең ірі мегаполисі – Алматы қаласында жол қозғалысы қауіпсіздігін қамтамасыз етуге арналған "Менің қауіпсіздігім – менің қолымда" атты кең ауқымды науқан ұйымдастырылды.
Шара Алматы қалалық полиция департаментінің, қала әкімдігінің және JET, WHOOSH, Яндекс шеринг-компаниялары мен мотоцикл мектебінің қолдауымен өткізілді.
Алматы – күн сайын жолдарымен миллионнан астам автокөлік жүретін заманауи мегаполис. Қала ішіндегі және қала сырты бағытындағы көлік қозғалысының қарқынына байланысты жол қауіпсіздігі мен жол ережелерін сақтау – қала үшін маңызды басымдықтардың бірі.
Науқан барысында қатысушылар мотоциклдер шеруін және "Жас сақшы" сыныптары мен жас жол инспекторларының салтанатты шеруін тамашалады. Аталған іс-шаралар қоғам назарын жол қозғалысы ережелерін сақтаудың маңыздылығына және балалар мен жастар арасында жолда қауіпсіздік мәдениетін қалыптастыруға аударды.
Сонымен қатар шара аясында арнайы оқу-жиындар ұйымдастырылып, онда мамандар электросамокаттар мен мопедтерді қауіпсіз жүргізу ережелері мен осы көлік түрлерін пайдаланушыларға қойылатын талаптар туралы жан-жақты түсіндірді.
Қатысушылар мен қала тұрғындары үшін сұрақ-жауап алаңы, тақырыптық ойындар, флешмобтар өткізілді. Сонымен қатар шара барысында жол қозғалысы қауіпсіздігіне арналған бұл бастаманы қолдауға танымал қазақстандық әртістер де келді.
Алматы қалалық полиция департаментінің бастығы Арыстанғани Заппаров іс-шараның маңыздылығына тоқталды.
- Мұндай ауқымды іс-шаралар жол-көлік оқиғаларының алдын алуға және барлық қатысушылар – жүргізушілер, жаяу жүргіншілер мен жеке көлік құралын пайдаланушылар арасында жауапкершілік мәдениетін қалыптастыруға бағытталған маңызды қадам болып табылады. Барша қала тұрғындарын жол қозғалысы ережелерін қатаң сақтауға шақырамыз, – деп атап өтті ол.
