Алматыда көктемгі-жазғы кезеңде жол қозғалысы қауіпсіздігін қамтамасыз ету мәселелері талқыланды, – деп хабарлайды Polisia.kz.
Көктем-жаз маусымының басталуымен Алматы қаласының әкімшілік полициясы жол қозғалысы қауіпсіздігін қамтамасыз ету жұмыстарын күшейтті.
Осы іс-шара аясында аудандық жергілікті атқарушы органдардың өкілдерімен жұмыс кездесуі өтіп, онда барлық жол қозғалысына қатысушы үшін қауіпсіз жағдай жасауға бағытталған негізгі мәселелер талқыланды.
Жиынның күн тәртібінде жол белгілерін жаңарту, жол белгілерін ауыстыру және орнату, бағдаршамдар мен белгілердің көрінуіне кедергі келтіретін ағаштарды кесу, жалпы жол инфрақұрылымын жақсарту сынды маңызды мәселелер қаралды. Жаяу жүргіншілер мен жүргізушілер үшін ең үлкен қауіп төнетін және жол-көлік оқиғасы жиі болатын аймақтарға ерекше назар аударылды.
- Әкімшілік полициясы жол қозғалысы қауіпсіздігін қамтамасыз ететін негізгі субъектілердің бірі ретінде жол желісін үнемі тексеріп отырады. Оның қорытындысы бойынша біз қажетті шаралар тізбесін қалыптастырып, оны уәкілетті органдарға жібереміз. Бұл жай ғана бақылау емес, апаттық жағдайлардың алдын алуға бағытталған бірлескен жұмыс. Біздің мақсатымыз – қала жолдарында барынша қауіпсіз жағдай жасау, - деді Алматы қалалық ПБ әкімшілік полиция басқармасының бастығы Асхат Құлбаев.
Кездесу барысында екі жақ анықталған кемшіліктерді тез арада жою бойынша жұмыстарды үйлестіру туралы келісімге келді. Алматы полициясы жол-көлік инфрақұрылымының жағдайын бақылау және жол-көлік оқиғаларын азайту бойынша шаралар қабылдауды жалғастырады.
